घरजग्गा कर्जा ५५ प्रतिशतले वृद्धि

काठमाडौं । ब्याजदर घट्दै गएपछि घरजग्गा कर्जा पनि बढ्न थालेको छ । 

अघिल्लो आवको तुलनामा गत आवमा बैंक तथा वित्तीय संस्थाहरुको घरजग्गा कर्जा ५५ प्रतिशतले बढेको नेपाल राष्ट्र बैंकले जनाएको छ ।

नेपाल राष्ट्र बैंकका अनुसार गत आवमा घरजग्गा क्षेत्रमा ५७ अर्ब ५८ करोड रुपैयाँ कर्जा प्रवाह भएको छ । अघिल्लो आव ०७९/८० मा ३१ अर्ब ५१ करोड रुपैयाँ कर्जा प्रवाह भएको थियो ।

गत वर्ष रियल इस्टेट शर्षिकमा प्रवाह हुने कर्जा घटेको छ भने व्यक्तिगत आवासीय घरकर्जा बढेको देखिन्छ । गत वर्ष व्यक्तिगत आवासीय घरकर्जा ३८ अर्ब ८९ करोड रुपैयाँ र रियल इस्टेट कर्जा १८ अर्ब ६९ अर्ब रुपैयाँ थपिएको छ । 

अघिल्लो आवमा व्यक्तिगत आवासीय घरकर्जा १० अर्ब ३२ करोड र रियल इस्टेट कर्जा २१ अर्ब १९ करोड रुपैयाँ थपिएको थियो । 

नेपाल राष्ट्र बैंकले अधिकतम दुई करोडसम्मको घरकर्जालाई व्यक्तिगत आवासीय र दुई करोडभन्दा बढीको कर्जालाई रियल इस्टेट कर्जामा गणना गर्ने व्यवस्था गरेको छ ।

रियल इस्टेट शिर्षकमा प्रवाह भएको कुल कर्जामध्ये रेसिडेन्सियल रियल इस्टेट (व्यक्तिगत आवासीय घरकर्जाबाहेक) सात अर्ब ६ करोड रुपैयाँ, कमर्सियल कम्पलेक्स एन्ड रेसिडेन्सियल अपार्टमेन्ट निर्माण कर्जा दुई अर्ब २४ करोड रुपैयाँ, जग्गा खरिद तथा प्लटिङमा १४ अर्ब ११ करोड रुपैयाँ कर्जा प्रवाह भएको छ । 

आम्दानी सिर्जना गर्ने कमर्सियल कम्पलेक्समा प्रवाह हुने ऋण भने ऋणात्मक छ । पछिल्लो समय व्यापार सुस्ताएपछि कम्पलेक्स पनि प्रभावित बनेका छन् । जसले गर्दा नयाँ कम्पलेक्स निर्माण र कर्जा लगानी घटेको छ ।