कुश्माको द क्लिफमा विश्वकै लामो र अग्लो ‘मेगाट्रोल’ को सफल परिक्षण

काठमाडौं । साहसिक पर्यटनका लागि प्रमुख गन्तव्य बन्दै गएको कुश्मास्थित ‘द क्लिफ’मा विश्वकै लामो र अग्लो ‘मेगाट्रोल’ सञ्चालनमा आउने भएको छ । दुई सय ५५ मिटर अग्लो मेगाट्रोलको लम्बाइ १२ सय २८ मिटर छ ।

यसमा  एकै पटकमा तीन जनासम्म खेल्न सकिने बताइएको छ । एक्लै वा जोडीसँगै पनि खेल्न सकिने द क्लिफका अध्यक्ष राजु कार्कीले बताए ।  उनका अनुसार मेगाट्रोलको गति प्रतिघण्टा १ सय ४० किलोमिटरको हुनेछ ।

'द क्लिफले विश्वकै दोस्रो अग्लो बञ्जी जम्प, स्वीङ, स्काइ साइकलिङलगायत साहसिक पर्यटकीय गतिविधिका साथै सुविधासम्पन्न रिसोर्टको सुविधा उपलब्ध गराउँदै आइरहेको छ,' अध्यक्ष कार्कीले भने, ‘अब साहसीय गतिविधि रुचाउने पर्यटकलाई मेगाट्रोल पनि उपलब्ध गराउन लागिएको छ ।'

मेगाट्रोल पनि साहसिक गतिविधिमै पर्छ । यसले जीपलाइन र रोलरकोस्टरको ब्लेन्डेड अनुभव दिने कार्कीको भनाइ छ । उनले भने, ‘एक वर्षअघि निर्माण सुरु गरिएको मेगाट्रोल करिब दुई सातामा सञ्चालनमा ल्याउने गरी काम गरिरहेका छौँ , हाल यसको परीक्षण भइरहेको छ ।'

कालीगण्डकी नदीको मनोरम दृश्य हेर्दै यसको अनुभव लिन सकिन्छ । कार्कीले थपे, यहाँ पर्यटकका लागि थप सुविधा उपलब्ध गराउन पाएकामा निकै खुसी लागेको छ, यसले पर्यटनसँगै आर्थिक र सामाजिक विकासमा थप भूमिका निर्वाह गर्ने हाम्रो अपेक्षा छ '