इमाडोल क्षेत्रमा सबैभन्दा धेरै घरजग्गा बिक्रीका लागि लिस्टिङ, यी हुन् नौ हटस्पट

काठमाडौं । ललितपुरको इमाडोल क्षेत्र घरजग्गा कारोबारमा उपत्यकाकै उम्दा हटस्पट बनेको छ । पछिल्लो समय इमाडोल क्षेत्रमा सबैभन्दा धेरै घरजग्गा किनबेच भइरहेको तथ्यांकले नै देखाउँछ । 

रियल इस्टेट अनलाइन प्लेटफर्महरु चहार्दा इमाडोल क्षेत्रमै सबैभन्दा धेरै घरजग्गा बिक्रीका लागि लिस्टिङ गरिएको देखिन्छ । आज तपाइँलाई उपत्यकाका त्यस्ता १० प्रमुख स्थानहरुको बारेमा जानकारी गराउँदै छौं, जहाँ बसोबासका लागि मान्छेको बढी अभिची देखिएको छ । 

रियल इस्टेटको पायोनियर अनलाइन प्लेटफर्म ‘नेपालहोम्स डटकम’मा लिस्टिङ भएका घरजग्गाको आधारमा हामीले प्रमुख १० स्थान छुट्याएका छौं । जुन ठाउँमा सबैभन्दा धेरै प्रोपर्टी बिक्रीका लागि सूचीकृत भइरहेका छन्, ती स्थानहरुको बारेमा जानकारी गराउन गइरहेका छौं । 

१) इमाडोल, ललितपुर
इमाडोल उपत्यकाकै सबैभन्दा बढी घरजग्गा किनबेच हुने क्षेत्रमा दहरिँदैछ । अहिले इमाडोल क्षेत्र आवासीय घरहरुले भरिँदै छ । बस्ती बाक्लिदै गएसँगै इमाडोल क्षेत्र घरजग्गा कारोबारका लागि उपत्यकाकै ‘इमर्जिङ हटस्पट’ बनेको छ ।

पछिल्लो समय इमाडोल क्षेत्रमा घरजग्गा खरिद बिक्रीको चाप देखिन्छ । नेपालहोम्स डटकममा इमाडोल क्षेत्रबाट ६२८ वटा घरजग्गा बिक्रीको लागि सूचीकृत छन् । रिङरोडबाट नजिक, यातायातको सहज पहुँच र अन्य क्षेत्रको तुलनामा केही सस्तोमा घरजग्गा पाइने हुँदा पनि इमाडोल क्षेत्रमा आकर्षण देखिएको हो । इमाडोल क्षेत्र निम्नमध्यम र मध्यम वर्गिय परिवारहरुहरुको बसोबासका लागि चर्चित मानिन्छ । 

२) भैंसेपाटी, ललितपुर 
ललितपुरको भैंसेपाटीमा धेरै घरजग्गा बिक्रीका लागि लिस्टिङ हुने गरेका छन् । उक्त क्षेत्र रियल स्टेटको हटस्पट नै हो । संघीय मन्त्री, प्रदेश प्रमुख, प्रदेशका मुख्यमन्त्री, ठूला नेता, व्यवसायी तथा सरकारका उच्चपदस्थ कर्मचारी बसोबास गर्ने भैंसेपाटी भीआईपी आवासीय क्षेत्रका रुपमा परिचित छ । जसकारण मूल्य पनि अचाक्ली चर्को छ । 

सहरी कोलाहलबाट केहि पर रहेको भैसेपाटी शान्त र रमणीय भएकोले पनि आवासका लागि एकदमै उपयुक्त मानिन्छ । मन्त्रीका क्वार्टर, अपार्टमेन्ट तथा हाउजिङ परियोजना, सुविधा सम्पन्न अस्पताल लगायतका सुविधा पनि सोही क्षेत्रमा छन् । 
अहिले भैसेपाटिमा आनाको ५० लाखभन्दा मुनिको जग्गा पाउनै मुश्किल पर्छ । त्यस क्षेत्रमा जग्गाको मूल्य आनाको डेढ करोडसम्म रहेको छ । नेपालहोम्स डटकममा भैंसेपाटी क्षेत्रबाट २९० घरजग्गा बिक्रीका लागि सूचीकृत छन् ।

३. बुढानिलकण्ठ, काठमाडौं
बुढानिलकण्ठ उपत्यकाभित्र एलिटहरुको आवासीय क्षेत्र भनेर चिनिन्छ । काठमाडौंको उत्तरी भेगमा रहेको बुढानिलकण्ठ शिवपुरी राष्ट्रिय निकुञ्जको काखमा रहेको छ । शान्त र रमणीय वातावरण भएकोले पनि मानिसले बासोबासका लागि बुढानिलकण्ठ क्षेत्रलाई अत्यधिक रुचाएका हुन् । 

वरिष्ठ नेता, उच्चपदस्थ कर्मचारी, व्यापार, कुटनीतिक नियोगका अधिकारी लगायतका हाईप्रोफाइल प्रायः बुढानिलकण्ठ क्षेत्रमा बस्ने गरेको पाइन्छ । शिवपुरी जंगल, बुढानिलकण्ठ मन्दिर, मुहानपोखरी आदि त्यस क्षेत्रको आकर्षण हुन् । त्यस क्षेत्रमा प्रिमियम लक्जरी हाउजिङ तथा अपार्टमेन्टहरु निर्माण भएका छन् । 

सबैको रोजाईमा परेपछि त्यस क्षेत्रमा घरजग्गाको भाउ पनि छोइनसक्नु बढेको छ । अहिले बुढानिकलकण्ठको कुनामै पुग्दा पनि आनाको ४०÷५० लाखभन्दा कम मूल्यमा जग्गा भेटिदैन । नेपालहोम्समा त्यस क्षेत्रबाट २८९ वटा घरजग्गा बिक्रीका लागि सूचीकृत छन् ।

४) टिकाथली, ललितपुर
ललितपुरकै टिकाथली क्षेत्र घरजग्गा कारोबारको नयाँ हटस्पट बन्दै छ । त्यो क्षेत्रमा पनि घरजग्गाको उच्च कारोबार छ । नेपालहोम्समा टिकाथली क्षेत्रका ९९ वटा प्रोपर्टिहरु बिक्रीका लागि सूचीकृत छन् ।

५. हात्तिवन, ललितपुर
शहरी कोलाहलबाट केहि पर शान्त वातावरणमा रहेको हात्तिवन आवासको लागि एकदमै उचित क्षेत्रअन्तर्गत पर्छ । अहिले त्यहाँ बस्ती बाक्लिदै गएको छ । त्यस क्षेत्रमा सामुदायिक आवास तथा अपार्टमेन्टहरुको निर्माण बढेको पाइन्छ । सातदोबाटोदेखि गोदावरीसम्मको सडकखण्ड बिस्तारको काम धमाधम भइरहेको छ । यसले गर्दा पनि त्यस क्षेत्रमा जग्गामा लगानी गर्नेको संख्या बढ्दै गएको हो । 

हात्तिवन आसपासमा अहिले जग्गाको मूल्य प्रतिआना ४०÷४५ लाखभन्दा माथि छ । नेपालहोम्स डटकममा हात्तिवन क्षेत्रका ११८ घर बिक्रीका लागि लिस्टिङ भएका छन् । 

६) बालुवाटार, काठमाडौं
बालुवाटार एकदमै महँगो र भिआईपी एरिया हो । प्रधानमन्त्री निवास, विभिन्न राष्ट्रका राजदुतावास रहेकोले यस क्षेत्रमा स्थानीय बाहेक ठूलो आम्दानी भएका उच्चवर्गका मानिस बस्दै आइरहेका छन् । अपार्टमेन्ट र हाउजिङको उल्लेख्य निर्माण भएको यस क्षेत्रमा विदेशी कुटनीतिक नियोगमा काम गर्ने विदेशी कर्मचारीहरुको बसोबास रहेको छ । 

त्यस क्षेत्रमा घर तथा अपार्टमेन्ट भाडामा लिएर बस्नेको संख्या बढि रहेको पाइन्छ । त्यस क्षेत्रमा घडेरी किनेर घर बनाउन जो कोहिले आट गर्नै सक्दैन । बालुवाटार क्षेत्रमा जग्गाको मूल्य प्रतिआना करोड पर्न थालेको छ । नेपालहोम्स डटकममा त्यस क्षेत्रका ११३ घरजग्गा बिक्रीका लागि सूचिकृत भएका छन् । 

७) सितापाइला, काठमाडौं
हरियो वनजंलको काखमा रहेको सितापाइला क्षेत्र शान्त र स्वच्छ वातावरणले भरिपूर्ण हुनाले आवासको लागि अति उत्तम क्षेत्र हो । साझ बिहानको वाकको लागि प्रशस्त उचित ठाउँ भएकोले पनि अन्य क्षेत्रको तुलनामा यहाँको बसाई स्वस्थकर मान्न सकिन्छ । व्यवस्थित आवास परियोजनाको विकासले गर्दा पनि यस क्षेत्रमा घरजग्गा किन्नेको संख्या बढेको पाइन्छ । यस क्षेत्रमा जग्गाको औसत मूल्य प्रतिआना ३५ लाख रहेको छ । नेपालहोम्स डटकममा सितापाइला क्षेत्रबाट ११० घरजग्गा सूचीकृत छन् ।

८) महाराजगञ्ज, काठमाडौं
महाराजगञ्जमा भाडाको घरमा बस्ने मानिसको संख्या धेरै रहेको छ । यस क्षेत्रमा विभिन्न राष्ट्रका राजदुतावास र आइएनजीओ रहेकोले भाडामा घर लिएर बस्ने विदेशीहरु धेरै छन् । राजदुतावास, शिक्षण अस्पताल, कान्ति बाल अस्पताल, राष्ट्रपति निवास, प्रहरी अस्पताल, प्रहरी तालिम केन्द्र लगायतले गर्दा धेरै मानिसलाई महाराजगञ्ज बसाई सहज भएको हो । 

देशकै शक्ति केन्द्र भएकोले सो क्षेत्र सुविधा सम्पन्न र विकासशील भएको बताइन्छ । यसले गर्दा मानिसको आकर्षण पनि बढेको हुन सक्छ । महाराजगञ्जमा घर किनेर बस्ने भन्दा पनि भाडाको घर तथा अपार्टमेन्टमा बस्नेको संख्या बढि रहेका छन् ।  नेपालहोम्स डटकममा महाराजगञ्ज क्षेत्रबाट बिक्रीका लागि १०१ युनिट घरजग्गा सूचीकृत भएका छन् ।

९) सानेपा, ललितपुर
रिङरोडभित्र रहेको सबैभन्दा आकर्षक आवासीय क्षेत्रमा सानेपा पर्छ । उच्चवर्गका मानिस तथा विदेशी कुटनीतिक नियोगका कर्मचारीहरु बसोबास गर्ने सानेपामा ठूला र व्यवस्थित हाउजिङ तथा अपार्टमेन्टहरु बनेका छन् । 
उपत्यकाकै राम्रा स्कुलमध्ये अधिकांश त्यसै क्षेत्रमा पर्छन् । त्यसैले पनि यो ठाउँ प्रिमियम आवासीय क्षेत्र बनेको हो । यहाँ खाली जग्गा भेट्याउनै मुस्किल छ, खाली जग्गा भेटिइहाल्यो भने पनि निकै चर्को छ । नेपालहोम्समा सानेपा क्षेत्रमा रहेका १०० वटा प्रोपर्टिहरु बिक्रीका लागि सूचीकृत छन् ।