घट्दो ब्याजदरले सस्तो पर्दैछ घरजग्गा कर्जा

काठमाडौं । बैंक तथा वित्तीय संस्थाहरुमा लगानीयोग्य रकम (तरलता) थुप्रिन थालेपछि कर्जाको ब्याजदर घट्दै गएको छ । एक वर्षको अवधिमा वाणिज्य बैंकहरुको कर्जाको ब्याजदर १५ प्रतिशतले घटेको छ ।

०७९ माघमा बैंकबाट प्रवाह हुने कर्जाको औषत ब्याजदर १३.०३ प्रतिशत रहेको थियो । चालू वर्षको माघसम्म आइपुग्दा कर्जाको ब्याजदर घटेर ११.०८ प्रतिशतमा झरेको नेपाल राष्ट्र बैंकले जनाएको छ । एक वर्षको अवधिमा वाणिज्य बैंकहरुको कर्जाको ब्याजदर १.९५ प्रतिशत बिन्दूले झरेको देखिन्छ, जुन १५ प्रतिशत हुन आउँछ । 

यस्तै, ०८० माघमा विकास बैंकहरुको भारित औषत ब्याजदर १२.८५ प्रतिशत र वित्त कम्पनीहरुको १३.९३ प्रतिशत रहेको छ ।

बैंक तथा वित्तीय संस्थाहरुमा तरलता थुप्रिने क्रम जारी रहेकोले कर्जाको ब्याजदर अझै घट्ने बैंकर बताउँछन् । अहिले वाणिज्य बैंकहरुको आधार दर (बेसरेट) एकल बिन्दूमा झरिसकेको छ । 

बैंकबाट कर्जा लिएर घरजग्गा खरिद गर्ने योजना बुनिरहेका ग्राहकलाई घट्दो ब्याजदरले पक्कै राहत दिनेछ । अहिले धेरै वाणिज्य बैंकले फिक्स रेट (स्थिर ब्याजदर)को कर्जा सिंगल डिजिटमै उपलब्ध गराउन थालिसकेका छन् । 

नबिल बैंक, राष्ट्रिय वाणिज्य बैंक, ग्लोबल आइएमई बैंक, सिटिजन्स बैंक, एनएमबि बैंक लगायतले १० प्रतिशतभन्दा कम स्थिर ब्याजदरमा कर्जाका स्किम ल्याएका छन् । विकास बैंकले नै ११ प्रतिशतको रेञ्‍ज मा कर्जा उपलब्ध गराउन थालिसकेको अवस्था छ । 

बैंकले पैसा थुप्रिन थालेसँगै निक्षेपको ब्याजदर घटाएका छन् । निक्षेपको ब्याजदर घटेसँगै बैंकको कष्ट अफ फन्ड घट्न जाँदा आधार दर पनि एकल बिन्दूमा झरेको हो । आधार दर घटेपछि कर्जाको ब्याजदर पनि घट्दै गएको बैंकरको भनाई छ । 

०८० माघमा वाणिज्य बैंकहरुको निक्षेपको औषत ब्याजदर ७.०१ प्रतिशत, विकास बैंकहरुको ८.२६ प्रतिशत र वित्त कम्पनीहरुको ९.४५ प्रतिशत कायम भएको छ । जबकी, गत वर्षको माघमा वाणिज्य बैंकहरुको निक्षेपको भारित औषत ब्याजदर ८.४१ प्रतिशत रहेको थियो ।

राष्ट्र बैंकका अनुसार निक्षेपको ब्याजदर घटेसँगै ०८० माघमा वाणिज्य बैंकको औषत आधार दर ९.०६ प्रतिशत, विकास बैंकको ११.१३ प्रतिशत र वित्त कम्पनीहरुको १२.७० प्रतिशतमा झरेको छ । जबकी, ०७९ माघमा वाणिज्य बैंकको औषत आधार दर १०.७२ प्रतिशत थियो । 

ब्याजदर घट्दा मासिक किस्ता पनि कम

ब्याजदर घट्दा ऋणीलाई मासिक किस्ता पनि कम पर्न जान्छ । उदाहरणका लागि, ०७९ माघमा २० वर्ष अवधिको एक करोड रुपैयाँ घरकर्जा लिँदा मासिक किस्ता औषतमा एक करोड आठ लाख ५८४ रुपैयाँ पथ्र्यो । त्यतिबेला वाणिज्य बैंकको औषत ब्याजदर १३.०३ प्रतिशत थियो । 

०८० माघसम्म आइपुग्दा एक वर्षमा ब्याजदर १.९५ प्रतिशत बिन्दूले घटेको छ । अर्थात् कर्जाको ब्याजदर ११.०८ प्रतिशतमा झरेको छ । अहिले सोही कर्जाको मासिक किस्ता ९२ हजार ३३५ रुपैयाँ पर्न आउँछ । 

एक वर्षमा घटेको ब्याजदरले ऋणीलाई मासिक किस्ता १६ हजार २४९ रुपैयाँ कम परेको देखिन्छ । 

ब्याजदर घट्दा ऋणीको कस्ट अफ लोन पनि घट्दै गइरहेको देखिन्छ । कस्ट अफ लोन घट्दा ग्राहकको क्रयशक्ति पनि बढाउँदै लैजान्छ ।