किन घट्यो अर्पार्टमेन्ट किनबेच ?

काठमाडौं । वर्ष ०८० बहुतले अपार्टमेन्ट किनबेचका लागि उत्साहप्रद रहेन । जग्गाको सिमितता रहेको काठमाडौं उपत्यकामा ठूल्ठूला अपार्टमेन्ट निर्माण र किनबेच बढ्नुपर्नेमा उल्टै घटेको भूमि व्यवस्थापन विभागको तथ्यांकले देखाएको छ ।

गत वर्ष ३४९ युनिट अपार्टमेन्ट किनबेच भएका छन् । यो संख्या अघिल्लो वर्ष ०७९ को तुलनामा ९४ युनिट कम कारोबार हो । सो वर्ष ४४३ युनिट अपार्टमेन्ट किनबेच भएका थिए ।

पछिल्लो समयमा अपार्टमेन्ट किनबेच निरन्तर घटिरहेको भूमि विभागको तथ्यांकले देखाउँछ । एकातिर नयाँ अपार्टमेन्ट निर्माण हुँदा खरिद बिक्रीका लागि स्टक युनिट नै छैनन् । अर्कोतिर, अपार्टमेन्टको मूल्य घरको भन्दा पनि महंगो छ । 

अपार्टमेन्टको अस्वभाविक मूल्यका कारण उपभोक्ताहरु अपार्टमेन्ट भन्दा सिंगल युनिट घर नै खरिद गर्न चाहेको देखिन्छ । 

नेपालमा ०७२ को भूकम्पपछि हाईराइज अपार्टमेन्ट खासै निर्माण भएका छैनन् । पछिल्लो समय घोषणा गरिएका अपार्टमेन्ट अझै निर्माण सम्पन्‍न भइसकेका छैनन् ।  
तर, पछिल्लो समय निर्माण सुरु गरिएका अपार्टमेन्टमा बस्‍नका लागि दुई करोड रुपैयाँभन्दा बढी मोल तिर्नुपर्छ । जबकी, यो मूल्यमा साढे दुई तलाकै घर पाइन्छन् । 

नेपालको शहरी मध्यमवर्गलाई तार्गेट गरेर एउटै अपार्टमेन्ट निर्माण सुरु भएका छैनन् । अहिले किनबेच भइरहेका अपार्टमेन्टहरु पनि भूकम्पअघि नै निर्माण सम्पन्‍न भइसकेका वा निर्माण सुरु गरिएका हुन् । 

अहिले काठमाडौं, ललितपुर, भक्तपुर, पोखरा, भैरहवा, विराटनगर, वीरगञ्‍ज, इटहरी, झापा लगायत ठाउँमा अपार्टमेन्ट निर्माण सुरु भएका छन् । 

गत वर्ष सबैभन्दा बढी अपार्टमेन्ट भदौमा ४५ युनिट बिक्री भएका थिए । बाँकी ११ महिना अपार्टमेन्ट किनबेच ४० भन्दा कम युनिट रहेका छन् । सबैभन्दा कम चैतमा १८ युनिट मात्र अपार्टमेन्ट किनबेच भएको तथ्यांक छ । 

अघिल्लो वर्ष ०७९ असारमा ९८ युनिट अपार्टमेन्ट किनबेच भएको तथ्यांक छ । यस्तै, फागुनमा ५१ युनिट अपार्टमेन्ट किनबेच भएका थिए ।