सरकारी तथ्यांक नै भन्छ– निर्माण र रियल इस्टेट क्षेत्र अझै मन्दीमै (चार्टसहित)

काठमाडौं । यो वर्ष पनि मन्दीमा फसेको निर्माण क्षेत्र र रियल इस्टेट सम्बन्धि गतिविधिहरु अझै पुरानै लयमा फर्किन नसकेको सरकारी तथ्यांकले नै देखाएको छ । तर, अघिल्लो आर्थिक वर्षसँग तुलना गर्दा दुबै क्षेत्रको कारोबार सामान्य बढेको देखिन्छ । 

केन्द्रीय तथ्यांक कार्यालयले मंगलबार सार्वजनिक गरेको चालू आर्थिक वर्षको दोस्रो त्रैमासिक कुल ग्रार्हस्थ उत्पादन (जीडीपी) रिपोर्टले निर्माण र रियल इस्टेट क्षेत्रको कारोबारमा सुधारको शंकेत देखाएको हो । तर, अपेक्षित रुपमा दुबै क्षेत्र जुर्मुराउन नसकेको व्यवसायीको गुनासो छ ।

यस अवधिमा निर्माण क्षेत्रको कुल मूल्य अभिवृद्धिदर २.२ प्रतिशत र रियल इस्टेट सम्बन्धि गतविधिको वृद्धिदर २.७ प्रतिशत मात्र रहेको छ । अघिल्लो वर्षको दोस्रो त्रैमासमा निर्माण क्षेत्रको वृद्धि –८.८ प्रतिशत ऋणात्मक र रियल इस्टेट क्षेत्रको वृद्धि २.७ प्रतिशत रहेको छ ।

चालू आवको पहिलो त्रैमाससँग तुलना गर्दा निर्माण क्षेत्रको वृद्धिदर घटेको देखिन्छ भने रियल इस्टेट गतिविधिको वृद्धिदर सामान्य बढेको देखिन्छ । पहिलो त्रैमासमा निर्माण क्षेत्रको वृद्धि १२.५ प्रतिशत र रियल इस्टेट क्षेत्रको वृद्धि २.२ प्रतिशत रहेको छ ।

त्रैमासिक रुपमा तुलना गर्दा आव ०७८/७९ को पहिलो त्रैमासमा निर्माण क्षेत्रको कुल मूल्य अभिवृद्धिदर ८.६ प्रतिशत, दोस्रो त्रैमासमा ४.१ प्रतिशत, तेस्रो त्रैमासमा १०.३ प्रतिशत, चौथो त्रैमासमा ५.४ प्रतिशत, आव  ०७९/८० को पहिलो त्रैमासमा –६.८ प्रतिशत, दोस्रो त्रैमासमा –८.८ प्रतिशत, तेस्रो त्रैमासमा –४.२ प्रतिशत र चालू आव ०७९/८० पहिलो त्रैमासमा १२.५ प्रतिशत र दोस्रो त्रैमासमा २.२ प्रतिशतको वृद्धिदर हासिल भएको देखिन्छ ।

यस अवधिमा निर्माण क्षेत्रको कारोबारमा निकै उतारचढाव आएको देखिन्छ । पछिल्लो अढाई वर्षयता मन्दीले सरकारीदेखि निजी निर्माणसम्म सुस्त छ ।

घरजग्गा (घरजग्गा किनबेच, भाडा आदि) सम्बन्धी गतिविधिको कारोबारमा त्यति उतारचढाव देखिदैन । आव ०७८/७९ को चारवटै त्रैमासमा रियल इस्टेट गनिविधिको कुल मूल्य अभिवृद्धिदर १.६ प्रतिशत, आव ०७९/८० चारवटै त्रैमासमा २.२ प्रतिशत वृद्धि र चालू आव ०८०/८१ को पहिलो त्रैमासमा २.२ र दोस्रो त्रैमासमा २.७ प्रतिशतको वृद्धि हासिल भएको देखिन्छ ।

चालू आवको दोस्रो त्रैमासमा देशको समग्र अर्थतन्त्रको वृद्धि अघिल्लो आवको सोही अवधिको तुलनामा ४ प्रतिशतले बढेको तथ्यांक कार्यालयले प्रारम्भिक प्रक्षेपण गरेको छ ।