ब्याज घट्दा पनि किन बढ्न सकेन घरजग्गा कारोबार ?

काठमाडौं । निरन्तर उकालो लागिरहेको घरजग्गा कारोबारमा फेरी ब्रेक लागेको छ । पछिल्लो दुई महिनायता घरजग्गा कारोबार बढ्न नसकेको भूमि व्यवस्थापन विभागको तथ्यांकले देखाउँछ । 

०८० को अन्तिम महिना चैतमा देशभर ५० हजार २५२ घरजग्गाको लिखत पारित भएका छन् । यो संख्या अघिल्ला महिना माघ र फागुनको तुलनामा केही कम हो ।  

पुस महिनामा ४६ हजार ३० घरजग्गाको लिखत पारित भएकोमा माघमा बढेर ५० हजार ९२१ र फागुनमा ५० हजार ९९८ घरजग्गाको लिखत पारित भएको थियो । 
चैत महिनामा घरजग्गा किनबेच बढ्ने अपेक्षा विपरित उल्टै कारोबार घटेको घरजग्गा व्यवसायीहरु बताउँछन् । 

बैंक तथा वित्तीय संस्थाहरुमा तरलता (लगानीयोग्य रकम) पर्याप्तता, घट्दो ब्याजदर, कर्जा प्रवाहमा सहजीकरण, कित्ताकाट खुल्ला, लगानीका अन्य क्षेत्रहरुमा संकुचन लगायत कारणबीच पनि चैतमा घरजग्गा कारोबार बढ्न सकेन । 

पछिल्लो समय बैंकले १० प्रतिशतभन्दा कम ब्याजदरमै घरकर्जा उपलब्ध गराउन थालेका छन् । 

चैतमा पनि सबैभन्दा धेरै घरजग्गा सुनसरीको इनरुवामा किनबेच भएका छन् । एक महिनाको अवधिमा इनरुवा मालपोतबाट दुई हजार ८२ घरजग्गाको लिखत पारित हुँदा झापाको भद्रपुर मालपोतबाट १८ सय ३५, मोरङको बेलवारी मालपोतबाट १७ सय ९९ घरजग्गा किनबेच भएको विभागको तथ्यांकले देखाउँछ ।

किनबेच घटेपनि राजश्व बढ्यो

चैतमा घरजग्गा किनबेच घटेपनि राजश्‍व संकलन भने बढेको छ । एक महिनामा देशभरबाट तीन अर्ब ९४ करोड ८१ लाख रुपैयाँ मालपोत राजश्‍व उठेको छ । 

अघिल्ला महिना फागुनमा तीन अर्ब ५९ करोड २६ लाख र माघमा तीन अर्ब ३७ करोड ५७ लाख रुपैयाँ राजश्‍व उठेको थियो । चैतमा पछिल्लो पाँच महिनायताकै उच्च राजश्‍व उठेको देखिन्छ ।

चैतमा रजिष्ट्रेसन दस्तुरवापत दुई अर्ब ४९ करोड १८ लाख रुपैयाँ, पुँजीगत लाभकरवापत एक अर्ब ४६ करोड ९१ लाख रुपैयाँ, सेवा शुल्कबाट ३१ करोड ५२ लाख रुपैयाँ उठेको छ ।