नौ महिनाको अवधिमा सिमेन्ट र क्लिंकर गरी २५ लाख नौ हजार ५७७ टन निर्यात भएको भन्सार विभागले जनाएको छ ।
काठमाडौं । आधुनिक निर्माण सामाग्री सिमेन्ट र क्लिंकर (अर्धप्रशोधित सिमेन्ट) को निर्यात उत्साहप्रद देखिएको छ । चालू आर्थिक वर्षको पहिलो नौ महिनामा नेपालबाट दुई अर्ब ९७ करोड ४६ लाख रुपैयाँको सिमेन्ट तथा क्लिंकर निर्यात भएको छ ।
नेपाली सिमेन्ट भारतीय सिमावर्ती क्षेत्रमा निर्यात हुँदै आइरहेको छ । भन्सार विभागको तथ्यांकमा सिमेन्ट र क्लिंकरको निर्यात करिव बराबरी देखिन्छ । सरकारले निर्यातमा नगद अनुदान र बिजुलीको महशुलमा १५ प्रतिशतसम्म छुटको व्यवस्था गरेपछि सिमेन्ट र क्लिंकर निर्यात उत्साहप्रद देखिएको हो ।
नौ महिनामा एक अर्ब ४७ करोड ८९ लाख रुपैयाँको चार लाख ३९ हजार १०५ टन क्लिंकर निर्यात भएको छ भने एक अर्ब ४९ करोड ५७ लाख रुपैयाँको २० लाख ७० हजार ४७३ टन तयारी सिमेन्ट निर्यात भएको छ ।
यो अवधिमा सिमेन्ट र क्लिंकर गरी २५ लाख नौ हजार ५७७ टन निर्यात भएको भन्सार विभागले जनाएको छ ।
अहिले पाल्पा सिमेन्ट, अर्घाखाँची, बालाजी, सिजी पाल्पा, सौर्य, सर्वोत्तम लगायत कम्पनीले सिमेन्ट निर्यात गर्दै आइरहेका छन् ।
मन्दीले निर्माण क्षेत्र सुस्त बनेपछि घरेलु बजारमा सिमेन्टको बिक्री कम छ । यही बेला व्यवसायीहरुले भारतीय बजारमा सिमेन्ट निर्यातमा ध्यान केन्द्रित गरिरहेका छन्
नेपालबाट ०७९ असारदेखि सिमेन्ट निर्यात सुरु भएको थियो । छोटो अवधिमा सिमेन्टको बढ्दो निर्यातले उत्साह थपेको छ ।
यो आर्थिक वर्षमा करिव पाँच अर्बको सिमेन्ट तथा क्लिंकर निर्यात गर्ने उद्योगीहरुको लक्ष्य छ । तर, अहिलेसम्मको अवस्था हेर्दा निर्यात सजिलै चार अर्ब नाघ्ने देखिन्छ ।