८ महिनामा साढे दुई अर्बको सिमेन्ट निर्यात

काठमाडौं । नेपालको निर्यात व्यापारमा निर्माण सामाग्री सिमेन्टले उत्साह ल्याएको छ । चालू आर्थिक वर्षको पहिलो आठ महिनामा दुई अर्ब ४७ करोड १७ लाख रुपैयाँ बराबरको सिमेन्ट तथा क्लिंकर भारत निर्यात भएको छ ।

मन्दी लगायत कारणले अन्य वस्तुहरुको निर्यात सुस्त भइरहेको बेलामा सिमेन्टको निर्यात भने निरन्तर बढिरहेको छ । फागुन महिनामा मात्रै ४१ करोड ९ अर्ब रुपैयाँ बराबरको सिमेन्त र क्लिंकर निर्यात भएको भन्सार विभागले जनाएको छ ।

आठ महिनामा एक अर्ब १९ करोड रुपैयाँ बराबरको तीन लाख ९२ हजार ७५४ टन तयारी सिमेन्ट निर्यात भएको छ । यस्तै, एक अर्ब २८ करोड ३० लाख रुपैयाँ बराबरको १९ लाख चार हजार २२८ टन क्लिंकर (अर्धप्रशोधित सिमेन्ट) निर्यात भएको देखिन्छ ।

तथ्यांकले सिमेन्ट भन्दा सिमेन्ट बनाउने कच्चा पदार्थ क्लिंकर निर्यात धेरै भएको देखाउँछ । भारतीय सिमावर्ती क्षेत्रमा रहेका ग्रान्डिङ उद्योगले नेपालबाट क्लिंकर लगेर सिमेन्ट उत्पादन गरिरहेका उद्योगीको भनाई छ ।

नेपालमा ०७९ असारदेखि सिमेन्ट निर्यात सुरु भएको थियो । सिमेन्ट निर्यात गर्ने पहिलो उद्योग पाल्पा सिमेन्ट बनेको थियो । निर्यातको छोटो अवधिमै सिमेन्टले निर्यात व्यापारमा उत्साह ल्याउने काम गरेको छ ।

यो आर्थिक वर्ष करिव पाँच अर्बको सिमेन्ट र क्लिंकर निर्यात हुने उद्योगीहरुले अनुमान गरेका छन् ।

अहिले पाल्पासहित अर्घाखाँची, बालाजी, सौर्य, सर्वोत्तम, सिजी पाल्पा लगायत उद्योगबाट उत्पादित सिमेन्ट तथा क्लिंकर भारतीय बजारमा पुग्न थालेको छ ।