भैरहवामा अधिकतम २७ करोड मूल्यांकनको जग्गालाई बैंकले दियो दुई अर्ब २० करोड ऋण !

काठमाडौं । भैरहवामा सरकारी मूल्यांकनअनुसार अधिकतम २६ करोड ७२ लाख ९२ हजार रुपैयाँ पर्ने जग्गा धितो राखेर एक बैंकले दुई अर्ब २० करोड २० लाख रुपैयाँ ऋण लगानी (कर्जा प्रवाह) गरेको देखिएको छ ।

मालपोत कार्यालय भैरहवाबाट एउटा प्राइभेट लिमिटेड कम्पनीको नाममा सह–वित्तीयकरण कर्जा सुविधा अन्तर्गत एक बैंकले १९२ कट्ठा जग्गा २ अर्ब २० करोड २० लाखमा दृष्टिबन्धक लिखत पास गरेको देखिएको महालेखा परीक्षकको कार्यालयले आफ्नो ६२औं प्रतिवेदनमा औंल्याएको छ ।

महालेखाको प्रतिवेदनमा भनिएको छ, ‘जग्गाको यथार्थ मूल्यांकन नहुँदा राजश्व असुलीमा परेको प्रभाव र यसबाट सर्वसाधारणको निक्षेपमा पर्ने जोखिम सम्बन्धमा छानविन हुनुपर्छ ।’

सो क्षेत्रमा जग्गाको सरकारी न्यूनतम मूल्यांकन प्रतिकट्ठा मूल्य एक लाख ७६ हजारदेखि १३ लाख ९२ हजार रहेको महालेखाले जनाएको छ ।

मालपोत नियमावली, २०३६ मा न्यूनतम मूल्य निर्धारण समितिले प्रत्येक वर्षको असार मसान्तभित्र जग्गाको न्यूनतम मूल्य निर्धारण गर्ने र न्यूनतम मूल्य निर्धारण गर्ने आधारहरु आफैले तोक्न सक्ने व्यवस्था छ 

न्यूनतम मूल्य निर्धारण समितिले भौतिक पूर्वाधार, सडक, विगतका पारित लिखत, चलनचल्तीको खरिद बिक्री मूल्य र दृष्टिबन्धकको मूल्यलाई आधार मान्ने गरेको छ ।