नौ महिनामा घरजग्गा क्षेत्रमा ३२ अर्ब कर्जा प्रवाह

काठमाडौं । चालु आर्थिक वर्षको पहिलो नौ महिनामा बैंक तथा वित्तीय संस्थाहरुले घरजग्गा क्षेत्रमा ३१ अर्ब ८७ करोड रुपैयाँ कर्जा प्रवाह गर्न सकेका छन् । 

साउनदेखि चैतसम्म नौ महिनाको अवधिमा २० अर्ब १२ करोड व्यक्तिगत आवासीय घरकर्जा र ११ अर्ब १९ करोड रुपैयाँ रियल इस्टेट कर्जा प्रवाह भएको नेपाल राष्ट्र बैंकले जनाएको छ ।

हालसम्म (०८१ चैतसम्म) घरजग्गा क्षेत्रमा प्रवाह भएको कर्जाको कुल आकार ६ खर्ब ८७ अर्ब दुई करोड रुपैयाँ पुगेको छ । जसमध्ये चार खर्ब सात अर्ब १४ करोड रुपैयाँ व्यक्तिगत आवासीय घरकर्जा र दुई खर्ब ७९ अर्ब ८८ करोड रियल इस्टेट शिर्षकको कर्जा रहेको छ ।

चालु आवको नौ महिनामा घरजग्गा क्षेत्रमा कर्जा प्रवाह बढे पनि गत वर्षको सोही अवधिको तुलनामा भने कर्जाको वृद्धिदर घटेको छ ।

गत आवको यसै अवधिमा व्यक्तिगत आवासीय घरकर्जा ३८ करोड र रियल इस्टेट कर्जा दुई अर्ब ७६ करोड गरी कुल ४१ अर्ब ४० करोड रुपैयाँ कर्जा प्रवाह भएको थियो । रियल इस्टेट शिर्षकको कर्जा भने गत वर्षको तुलनामा यस वर्ष धेरै प्रवाह भएको छ ।

गत आवको नौ महिनामा दुई अर्ब ७६ करोड रियल इस्टेट कर्जा प्रवाह भएकोमा चालु आवको सोही अवधिमा ११ अर्ब १९ करोड प्रवाह भएको छ ।