सिमेन्ट निर्यातमा ४१ प्रतिशतले गिरावट, किन घट्यो ?

काठमाडौं । अढाई वर्षदेखि नेपालको वैदेशिक व्यापारमा उत्साह भरिरहेको सिमेन्ट र क्लिंकर निर्यात घट्न थालेको छ । 

चालु आर्थिक वर्षको पहिलो चार महिनामा सिमेन्ट निर्यात ४१ प्रतिशतले घटेको छ । निरन्तर बढिरहेको सिमेन्टको निर्यात भदौदेखि खस्किन थालेको हो ।

चालु आवको साउनदेखि कात्तिकसम्म ६६ करोड ५९ लाखको सिमेन्ट र क्लिंकर निर्यात भएको छ । जबकी, गत आवको सोही अवधिमा एक अर्ब १३ करोड ८ लाखको निर्यात भएको भन्सार विभागको तथ्यांक छ ।

०७९ असारदेखि नेपाली सिमेन्ट र क्लिंकर भारतीय सिमावर्ती बजारमा निर्यात सुरु भएको थियो । पहिलो आर्थिक वर्षमा करिव ७८ करोडको सिमेन्ट निर्यात भएकोमा दोस्रो आर्थिक वर्षमा तीन अर्ब ८५ करोडको निर्यात भएको थियो ।

अहिले भारतमा नेपाली सिमेन्टको माग नभएर निर्यात घटेको भने होइन । भारत सरकारले ब्युरो अफ इन्डियन स्टान्डर्ड (बीआइएस) नविकरणमा ढिलाइ गर्दा सिमेन्ट निर्यात घट्न थालेको हो । बीआइएस नभई भारतमा सिमेन्ट निर्यात गर्न पाइँदैन । तर, अर्घाखाँची लगायत सिमेन्ट उद्योगको बीआइएस नविकरण नभएको महिनौं भइसक्यो ।

निर्यातमा ठूलो योगदान पुराइरहेका उद्योगकै बीआइएस नविकरण नभएका कारण निर्यात खस्किन थालेको हो । 

चालु आवको चार महिनामा १६ करोड ९ लाख रुपैयाँ बराबरको २९ हजार ८५१ टन क्लिंकर (अर्धप्रशोधित) सिमेन्ट निर्यात भएको छ भने ४९ करोड ६९ लाख रुपैयाँ बराबरको दुई लाख ३९ हजार टन तयारी सिमेन्ट निर्यात भएको देखिन्छ ।

अहिले पाल्पा, सिजी पाल्पा, सर्वोत्तम, सौर्य लगायत उद्योगबाट सिमेन्ट र क्लिंकर निर्यात भइरहेको छ ।