रुकुमको ‘चौरजहारी नयाँ शहर’ निर्माणका लागि जग्गा प्राप्ती सुरु, अब काम अगाडि बढ्ला ?

काठमाडौं । रुकुम पश्चिमको घारीगाउँ (चौरजहारी नयाँ शहर) जग्गा एकीकरण आयोजनाका लागि जग्गा प्राप्ती सुरु भएको छ । जिल्ला प्रशासन कार्यालयले बिहीबार १५ दिनको सार्वजनिक सूचना प्रकाशित गर्दै चौरजहारी नगरपालिका–१ (साविक विजयश्वरी गाविस वार्ड ३ र ४) को ११ सय ३६ कित्ताका जग्गाधनीहरुलाई प्रमाणपत्र लिएर नयाँ शहर आयोजना कार्यालय चौरजहारीमा सम्पर्क गर्न अनुरोध गरेको छ ।

नयाँ शहर आयोजनाभित्र साविकको विजयश्वरी गाविस वार्ड नम्बर ३ का ५६२ कित्ता र वार्ड नम्बर ४ का ५७४ कित्ता जग्गा पर्ने बताइएको छ । सरकारले मध्यपहाडी (पुष्पलाल) लोकमार्गमा निर्माण गर्ने घोषणा गरेका एक दर्जन नयाँ शहरमध्ये एउटा चौरजहारी पनि हो ।

जिल्ला प्रशासन कार्यालयले प्रकाशित गरेको सूचनामा भनिएको छ– ‘३ चैत ०८० मा बसेको मन्त्रीपरिषद बैठकले गरेको निर्णयअनुसार नयाँ शहर आयोजना क्षेत्रभित्र पर्ने चौरजहारी नगरपालिका वडा नम्बर १ मा पर्ने जग्गाहरु जग्गा एकीकरण आयोजना सञ्चालन गर्न नगर विकास ऐन २०४५ को दफा १२ को उपदफा १२.१.२ बमोजिम हुने गरी जग्गा प्राप्ति ऐन २०३४ को दफा ३ अनुसार जग्गा प्राप्त गरिने हुँदा सोही ऐनको दफा ९ को उपदफा १ प्रयोजनको लागि यो सूचना प्रकाशित गरिएकोले सम्बन्धित सरोकारवाला जग्गाधनीहरुले १५ दिनभित्र आफ्नो हकदैया सम्बन्धी प्रमाणहरु लिएर नयाँ शहर आयोजनाको कार्यालय चौरजहारीमा सम्पर्क राख्न यो सूचना प्रकाशित गरिएको छ ।’

सरकारले आर्थिक वर्ष ०६७÷६८ मा मध्यपहाडी लोकमार्गमा १२ वटा नयाँ शहर निर्माण गर्ने घोषणा गरेको थियो । जसको काम अहिले सुस्त गतिमै भए पनि अगाडि बढिरहेको शहरी विकास मन्त्रालयले जनाएको छ । 

प्रत्येक सहरमा एक लाख जनसंख्या अट्ने गरी विकास गर्न लागिएका ती सहर बसाइ सराई रोक्नका लागि छनोट गरिएका हुन् । 

सरकारले बसाइ सराइलाई रोक्ने अवधाराणासहित तराई, पहाडदेखि हिमालसम्म सुविधा सम्पन्न नयाँशहर विकास गर्ने रणनीति बनाएको छ । अहिलेसम्म देशका विभिन्न ठाउँका ५८ बस्ती छनौट गरेर स्तरोन्नती गरी आधुनिक शहरमा रुपान्तरण गर्ने घोषणा भइसकेको छ ।