नौ महिनामै थपिए सवा २ लाख विद्यूत ग्राहक

काठमाडौं । नौ महिनाको अवधिमा सवा दुई लाखभन्दा बढी विद्यूतका ग्राहक (घरधुरी) थपिएका छन् । 

सामुदायिक उपभोक्ता समेत गरी विद्युत उपयोग गर्ने ग्राहकको संख्या ०८० असारसम्म ५६ लाख ४८ हजार ४२ रहेकोमा फागुनसम्म आइपुग्दा बढेर ५८ लाख ७३ हजार ८०७ पुगेको छ ।

विद्युतको उत्पादन बढेसँगै बिजुलीको पहुँच पुग्‍ने उपभोक्ता पनि तिब्र गतिमा बढ्दै गइरहेको आर्थिक सर्वेक्षणको तथ्यांकले देखाउँछ ।

०८० फागुनसम्म विद्युतको कुल जडित क्षमता ३ हजार ६० मेगावाट रहेको छ । जसमध्ये जलविद्युत २८ सय १८.९१ मेगावाट, सौर्य उर्जा ९७ मेगावाट र तापीय (थर्मल प्लान्ट) उर्जा ५३.४१ मेगावाट उत्पादन भएको छ । यस्तै, वैकल्पिक उर्जा प्रवद्र्धन केन्द्रद्धारा उत्पादित विद्युत ८४.७४ मेगावाट र चिनी मिलबाट सहउत्पादन प्रविधिमार्फत उत्पादित विद्युत ६ मेगावाट रहेको छ ।

राष्ट्रिय ग्रीडमा जडान भएको जलविद्युतमध्ये नेपाल विद्युत प्राधिकरणको स्वामित्वमा सञ्चालित विद्युत आयोजनाबाट ६६०.४५ मेगावाट, प्राधिकरणको सहायक कम्पनीमार्फत ४९२.९० मेगावाट र निजी क्षेत्रबाट सञ्चालित परियोजनाबाट १८ सय २२ मेगावाट उत्पादन भइरहेको छ ।

विद्युत उत्पादनमा वृद्धि हुँदै गएसँगै उर्जा उपलब्धता सहज बन्दै गएको आर्थिक सर्वेक्षणमा उल्लेख छ । पछिल्लो समयमा विद्युत आयातमाथिको निर्भरता कम भएको छ भने विद्युत निर्यात पनि बढ्दै गएको छ ।