गण्डकी प्रदेशमा पनि घट्यो घर–भवनको नक्सा पास

काठमाडौं । गण्डकी प्रदेशमा पनि नयाँ घर र भवन निर्माण सुस्ताएको छ । चालु आर्थिक वर्षको पहिलो ६ महिना (साउन–पुस)मा नयाँ घर र भवन निर्माणका लागि स्थायी नक्सा पास ३४.७२ प्रतिशतले घटेको राष्ट्र बैंकले हालै सार्वजनिक गरेको गण्डकी प्रदेशको आर्थिक गतिविधि अर्धवार्षिक प्रतिवेदनमा उल्लेख छ ।

चालु आर्थिक वर्षको साउनदेखि पुससम्म गण्डकी प्रदेशका ११ जिल्लामा ६९२ नयाँ घर तथा भवनको नक्सा पाएको देखिन्छ । अघिल्लो आर्थिक वर्षको सोही अवधिमा एक हजार ६० घर र भवनको नक्सा पास भएको थियो । 

पछिल्लो समय मन्दीको प्रभाव कम हुँदै गएपछि घर तथा भवन निर्माणले पनि गति लिने अपेक्षा गरिए विपरित नक्सा पास उल्टै घटेको देखिन्छ । मन्दीले सबैभन्दा धेरै प्रभाव निर्माण क्षेत्र र निर्माणजन्य सामाग्रीहरु उत्पादन गर्ने उद्योगमा परेको छ । अहिले निर्माण सामाग्री उत्पादन गर्ने उद्योगहरु ३० देखि ५० प्रतिशत क्षमतामा मात्र सञ्चालन भइरहेको सम्बन्धित उद्योगी बताउँछन् । 

यतिबेला देशैभर निजी घर, कमर्सियल भवनदेखि सरकारी भवनहरु निर्माणसम्म सुस्त हुँदै गइरहेको छ । हाउजिङ र अपार्टमेन्ट निर्माणले पनि गति लिन सकेको छैन । यी परियोजना धेरै होल्डमा छन् । 

समिक्षा अवधिमा गण्डकी प्रदेशका महानगर तथा नगरपालिकाहरुमा घरजग्गा रजिष्ट्रेसन भने बढेको राष्ट्र बैंकको प्रतिवेदनमा उल्लेख छ । ६ महिनामा गण्डकी क्षेत्रमा घरजग्गा रजिष्ट्रेसन २६.३९ प्रतिशतले वृद्धि भएको देखिन्छ । यो अवधिमा गण्डकी प्रदेशमा १५ हजार ५८५ घरजग्गा रजिष्ट्रेसन भएका छन् । गत वर्षको सोही अवधिमा त्यस क्षेत्रमा १२ हजार ३३१ घरजग्गा रजिष्ट्रेसन भएका थिए ।

घरजग्गा रजिष्ट्रेसन बढेसँगै राजश्‍व संकलन पनि बढेको छ । ६ महिनाको अवधिमा घरजग्गा रजिष्ट्रेसन वापतको राजश्‍व गत वर्षको तुलनामा ६.७ प्रतिशतले वृद्धि भएर ७८ करोड ७५ लाख रुपैयाँ पुगेको छ । गत आवको यसै अवधिमा ७३ करोड ८० लाख रुपैयाँ राजश्‍व संकलन भएको थियो ।