कम्पनीले देशमै पहिलो पटक केबलकार सेवा सञ्चालनमा ल्याएको २४ वर्ष पुरा भएको अवसर पारेर रिसोर्टको नयाँ प्रोजेक्ट निर्माण थालेको हो ।
काठमाडौं । मनकामना दर्शन प्रालिले लक्जरी रिसोर्ट सञ्चालनमा ल्याउने भएको छ । कम्पनीले मनकामना केवलकारको टप स्टेसनमा हाइ इन्ड रिसोर्ट सञ्चालनको तयारी थालेको हो ।
कम्पनीले देशमै पहिलो पटक केबलकार सेवा सञ्चालनमा ल्याएको २४ वर्ष पुरा भएको अवसर पारेर रिसोर्टको नयाँ प्रोजेक्ट निर्माण थालेको हो ।
नौ रोपनी क्षेत्रफलमा फैलिने ४० कोठाको रिसोर्ट निर्माण यसै बर्षदेखि सुरु हुने कम्पनीले जनाएको छ । रिसोर्ट निर्माणमा ४८ करोड रुपैयाँ लगानी हुने अनुमान छ । मनकामना मन्दिरमा दर्शन गर्न जाने पर्यटक तथा भक्तालुलाई सेवा प्रदान गर्ने कम्पनीले जनाएको छ ।
रिसोर्ट सञ्चालनमा आएपछि त्यस क्षेत्रम धार्मिक तथा पर्यटकीय गतिविधि अझै बढ्ने अनुमान गरिएको छ । साथै, स्थानीय स्तरमा रोजगारी सिर्जना हुने र स्थानीय उत्पादन पनि खपत हुने छ । देशका विभिन्न ठाउँबाट विदाको दिनमा स–परिवार घुम्न निस्कने र भारतीय तथा नेपाली धार्मिक पर्यटकलाई ध्यानमा राखेर लक्जरी रिसोर्ट सञ्चालन गर्न लागिएको हो ।
यो रिसोर्टको स्ट्रक्चर निर्माणको काम चाँडै थाल्ने कम्पनीको भनाई छ । रिसोर्ट निर्माण सुरु भएको साढे एक वर्षमा सञ्चालनमा ल्याइसक्ने लक्ष्य छ ।
रिसोर्टमा रेष्टुरेण्ट, सय जना क्षमताको कन्फ्रेन्स हललगायत सुविधा हुनेछन् ।