काठमाडौं र धुलिखेलमा खुले प्रख्यात थाई कम्पनी ‘दुसित’का दुईवटा हाई एन्ड लक्जरी होटेल

काठमाडौं । काठमाडौंको लाजिम्पाट र काभ्रेको धुलिखेलमा एकसाथ दुईवटा पाँचतारे होटेल सञ्‍चालनमा आएका छन् । लाजिम्पाटमा ‘दुसित प्रिन्सेस काठमाडौं’ र धुलिखेलमा ‘दुसित थानी हिमालयन रिसोर्ट’ सञ्‍चालनमा आएका हुन् ।

एकसाथ सञ्‍चालनमा आएका दुईवटा होटेलमार्फत थाइल्यान्डको प्रख्यात हस्पिटालिटी कम्पनी ‘दुसित इन्टरनेशनल’ नेपाल भित्रिएको छ । ‘दुसित थानी’ र ‘दुसित प्रिन्सेस’ दुबै दुसित ग्रुपका चेन होटेल एन्ड रिसोर्ट ब्रान्ड हुन् । 

दुसित थानी ‘अपर अपस्केल’ ब्रान्ड हो भने दुसित प्रिन्सेस ‘अपर मिडस्केल’ ब्रान्ड हो ।

एकै पटक सञ्‍चालनमा आएका दुईवटै होटेल/रिसोर्टमा साढे दुई अर्ब रुपैयाँका दरले कुल पाँच अर्ब रुपैयाँ लगानी भएको छ ।

धुलिखेलको रिसोर्टमा दुसित थानी लगानीकर्ताकै रुपमा भित्रिएको हो भने काठमाडौंमा दुसित प्रिन्सेस होटेल व्यवस्थापकका रुपमा मात्र भित्रिएको हो ।

दुसित प्रिन्सेस काठमाडौं

होटल लासा इन्टरनेसनलको लाजिम्पाटमा सञ्‍चालनमा ल्याएको होटलमा थाइल्यान्डको चर्चित चेन ब्रान्ड दुसित प्रिन्सेस भित्रिएको हो । यो होटेल औपचारिक सञ्‍चालनमा आएको शनिबारदेखि हो । तर, सफ्ट ओपनिङ पहिल्यै भएको थियो ।

दसित प्रिन्सेसमा १०७ कोठा छन्, जसमा प्रेसिडेन्सियल स्वीट, सुपेरियर किङ, सुपेरियर ट्वीन, जुनियर स्वीट, एक्जुकेटिभ किङ, एक्जुकेटिभ ट्वीन, डिलक्स किङ र डिलक्स ट्वीन छन् ।

यस्तै दुईवटा विशाल सभाहल छन् । 

होटलमा करिव साढे दुई अर्ब रुपैयाँ लगानी भएको अध्यक्ष तेन्जिङ लामाले बताए । यो होटेल सन् २०१६ मै निर्माण सुरु गरिएको थियो । तर, कोभिड महामारी लगायत विविध कारणले होटल निर्माण सम्पन्‍न गर्न सात वर्ष लागेको उनको भनाई छ ।

१२ तले होटलमा स्पा, स्विमिङ पुल, ७० वटा कार पार्किङ सुविधा छ । निकट भविष्यमै क्यासिनो समेत ल्याउते तयारी भएको सञ्‍चालकले बताए ।

दुसित इन्टरनेशनलकी ग्रुप सीइओ सुफाजी सुथुमपुनले यो सहकार्यले नेपालमा पाहुनाले अपेक्षा गरेभन्दा भिन्‍न अनुभवन गर्न पाउने बताइन ।

अहिले होटल सञ्‍चालनको अवसर पारेर ‘इन्ट्रोडक्टरी प्राइस’ एक सय २५ डलर (करिव १६ हजार रुपैयाँ) रुपैयाँ तोकिएको छ ।

दुसित थानी हिमालयन रिसोर्ट

धुलिखेल रिसोर्टमा दुसित थानी समूहको ८५ प्रतिशत रहेको छ । स्थानीय साझेदार गैरआवासीय नेपाली संघ थाइल्यान्डका पूर्वअध्यक्ष एवं धितोपत्र बोर्डका अध्यक्ष रमेश हमालको १५ प्रतिशत लगानी छ । 

यो रिसोर्ट काभ्रेकै पहिलो पाँचतारे हुनेछ ।

धुलिखेल नमःबुद्धमा रहेको रिसोर्ट ६३ रोपनी क्षेत्रफलमा फैलिएको छ, जसमा साढे दुई अर्ब लगानी भएको छ । रिसोर्टमा लक्जरी भिल्लासहितका ८५ कोठा छन् । 

एउटा कोठाको औषत लागत ३ करोड रुपैयाँ पुगेको नेपाली साझेदार हमालले बताए । उनैको पहलमा थाईल्यान्डको चर्चित ब्रान्ड दुसित थानी नेपाल आएको हो ।

पर्यटन विभागबाट पाँचतार डिलक्स स्तरको वर्गीकरण लिने तयारीमा रहेको यो रिसोर्ट देशकै पहिलो पाँचतारे वेलनेस लक्जरी रिसोर्ट हुने दाबी गरिएको छ ।

यस रिसोर्टमा बस्‍नका लागि न्यूनतम ३ सय अमेरिकी डलरदेखि अधिकतम १५ सय डलरसम्म प्रतिदिन खर्च गर्नुपर्ने हुन्छ । 

दुसित थानीले नेपालमा खर्चालु पर्यटकलाई लक्षित गरेर रिसोर्ट सञ्‍चालनमा ल्याएका हो ।