असोज दोस्रो साता काठमाडौंमा फर्निचर एक्स्पो हुने, सयभन्दा बढी स्टल

काठमाडौं । आगामी असोज दोस्रो साता काठमाडौंको भृकुटीमण्डपमा नवौं संस्करणको फर्निचर एक्स्पो आयोजना हुने भएको छ । नेपाल फर्निचर तथा फर्निसिङ संघले असोज १० देखि १४ गतेसम्म फर्निचर एक्स्पो आयोजना गर्न लागेको हो । 

राजधानीमा एक्स्पोको लञ्‍चिङ कार्यक्रमको आयोजना गरि आयोकजले एक्स्पोका सम्बन्धमा औपचारिक जानकारी गराएको हो । इभेण्ट लञ्‍चिङकै दिनदेखि एक्स्पोको स्टल बुकिङ खुल्ला गरिएको छ । कार्यक्रमस्थलमै ५० प्रतिशतभन्दा बढी स्टलहरु बुकिङ भएको आयोजकले बताएको छ ।  

नेपालको फर्निचर तथा फर्निसिङ क्षेत्रको उत्थान गर्दै नेपालमा उत्पादित वस्तु तथा सेवालाई एउटै छानामुनि प्रदर्शनीमा ल्याउने उद्देश्यका साथ एक्स्पो आयोजना गर्न लागेको संघका अध्यक्ष दिनेश अग्रवालले बताए । ‘आर्थिक गतिविधिहरु सुस्त भइरहेका बेला एक्स्पोले बजार चलायमान बनाउन सघाउने विश्‍वास लिएका छौं,’ उनले भने, ‘ स्टल बुकिङ खुल्ला भइसकेको छ, फर्निचर व्यवसायमा आबद्ध व्यवसायीहरुलाई सहभागिताका लागि अनुरोध गर्छौं ।’

एक्स्पोका संयोजक निकुञ्‍ज अग्रवालका अनुसार संघको डिल्लीबजार चारखालस्थित सचिवालयका साथै युनियन पार्क नजिकै रहेको इभेण्ट सोलुसनको कार्यलयमा सम्पर्क गरी स्टल बुकिङ गर्न सकिनेछ । साथै, अनलाइन माध्यमबाट पनि स्टल बुकिङ गर्ने व्यवस्था गर्ने तयारी भएको बताइएको छ ।

एक्स्पोमा सयभन्दा बढी स्टल रहनेछन् । एक्स्पोमा सहभागी हुन चाहनेलाई समयमा नै स्टल बुकिङ गर्न एक्स्पो संयोजक अग्रवालले आग्रह गरे । 

फर्निचर तथा फिर्निसिङ क्षेत्रमा आबद्ध व्यवसायीहरुलाई समेटेर बृहत रुपमा एक्स्पो आयोजना गर्न लागिएको हो । 

एक्स्पोमा मुख्यतया फर्निचर तथा फर्निसिङ सामग्री, उत्पादक, आयातकर्ता, वितरक, मेसिनरी तथा प्रविधि हस्तान्तरण, डिलर र व्यवसायीलाई केन्द्रित गरिनेछ । एक्स्पोले राष्ट्रिय तथा अन्तराष्ट्रिय ब्रान्डहरुलाई साझा प्लेटफर्म प्रदान गरी उपभोक्तासम्म पुग्‍न लागि सहज मार्ग निर्देशन गर्नेछ । 

फर्निचर र फर्निसिङ सामग्री उत्पादक, मेसिनरी आपूर्तिकर्ता, आयातकर्ता, वितरक, डिलर, इन्टेरियर डिजाइनर, स्टार्टअप तथा फर्निचर उद्योगमा काम गर्न इच्छुक मानिसहरुलाई साझा प्लेटफर्म प्रदान गर्ने एक्स्पोको उद्देश्य छ । 

५० हजार भन्दा बढीले अवलोकन गर्ने अपेक्षा गरिएको एक्स्पोमा राष्ट्रिय तथा अन्तर्राष्ट्रिय स्तरमा ख्यातिप्राप्त ब्रान्डहरुको सहभागिता रहने आयोजकले जनाएको छ । अवलोकनकर्तालाई आकर्षक गिफ्ट भौचर उपलब्ध गराउनुका साथै घर तथा कार्यालय सजावटका लागि विज्ञबाट सुझाव पनि उपलब्ध हुनेछ ।

एक्स्पो स्थलमै वास्तु तथा इन्टेरियर डिजाइनका लागि विशेष परामर्श सेवा पनि उपलब्ध गराइने भएको छ । 

फर्निचर तथा फर्निसिङ क्षेत्रको प्रवद्र्धन तथा विकासका लागि सन् २०१२ देखि आयोजना हुँदै आइरहेको फर्निचर एक्स्पो (फर्नेक्स नेपाल) ब्राण्डकै रुपमा स्थापित भइसकेको छ ।