दुई वर्षदेखि ऋणात्मक रहेको निर्माण क्षेत्रको वृद्धिदर यस वर्ष २.२१ प्रतिशत हुने प्रारम्भिक अनुमान

चालु आर्थिक वर्षमा अर्थतन्त्रको आकार ४.६१ प्रतिशतले बढेर ६१ खर्ब ७ अर्ब पुग्ने प्रारम्भिक अनुमान गरिएको छ

320views

काठमाडौं । विगत दुई वर्षदेखि ऋणात्मक रहेको निर्माण क्षेत्रको वृद्धिदर चालु आर्थिक वर्ष ०८१÷८२ मा सुधारोन्मुख देखिएको छ ।

केन्द्रीय तथ्यांक कार्यालयले चालु आर्थिक वर्षमा निर्माण क्षेत्रको कुल मूल्य अभिवृद्धि वृद्धिदर २.२१ प्रतिशत हुने प्रारम्भिक अनुमान गरेको छ ।

चालु आर्थिक वर्षमा निर्माण क्षेत्रको कुल गार्हस्थ्य उत्पादन (जीडीपी)मा ५.२४ प्रतिशत योगदान रहने अनुमान छ । चालु आर्थिक वर्षमा अर्थतन्त्रको आकार ४.६१ प्रतिशतले बढेर ६१ खर्ब ७ अर्ब पुग्ने प्रारम्भिक अनुमान गरिएको छ ।

यस वर्ष निर्माण क्षेत्रले गति लिएपछि निर्माण सामाग्रीको आयात र निर्माणजन्य औद्योगिक वस्तुहरुको उत्पादनमा भएको वृद्धिका कारण निर्माण क्षेत्र सुधारोन्मुख देखिएको हो ।

गत आर्थिक वर्ष ०८०/८१ मा निर्माण क्षेत्रको वृद्धिदर ऋणत्मक (–२.२० प्रतिशत) रहने संशोधित अनुमान गरिएको छ । यस्तै, आर्थिक वर्ष ०७९/८० को तथ्यांकअनुसार यस क्षेत्रको वृद्धिदर ऋणात्मक (–१.४८ प्रतिशत) कायम भएको तथ्यांक कार्यालयले जनाएको छ ।

पछिल्लो समय निर्माण कार्यले सामान्य गति लिएको छ । तर, अझै पनि पूर्ववत अवस्थामा सरकारी तथा निजी निर्माण कार्यले गति समातेको छैन ।

काठमाडौं महानगरपालिकाभित्र घर, भवन तथा अन्य संरचना निर्माणका लागि नक्सा पास गर्ने घटेपछि नक्सापास दस्तुर पनि करिव ४१ प्रतिशतले घटेको देखिन्छ ।