निर्माण क्षेत्र जुर्मुराउँदा खानी तथा उत्खनन् उद्योगसम्म तरङ्गित

काठमाडौं । लामो समयदेखि थलिएको निर्माण क्षेत्र तंग्रिन थालेपछि त्यसको चेन इफेक्ट खानी तथा उत्खनन् उद्योगसम्म परेको छ । 

चालु आर्थिक वर्षको दोस्रो त्रैमासमा निर्माण क्षेत्रको कुल मूल्य अभिवृद्धि वृद्धिदर ९.१ प्रतिशत रहने प्रारम्भिक अनुमान राष्ट्रिय तथ्यांक कार्यालयको छ । पहिलो त्रैमासमा निर्माण क्षेत्रको वृद्धिदर ०.९ प्रतिशत मात्र रहेको थियो । 

निर्माण क्षेत्र विस्तारै जुर्मुराउन थालेपछि खानी तथा उत्खनन् उद्योग पनि तंग्रिन थालेको छ ।

चालु आवको दोस्रो त्रैमासमा खानी तथा उत्खनन् क्षेत्रको वृद्धिदर ९.५ प्रतिशत रहेको अनुमान छ । जबकी, पहिलो त्रैमासमा वृद्धिदर ०.९ प्रतिशत मात्र रहेको थियो ।

पछिल्लो समय सरकारी तथा निजी निर्माणले गति लिन थालेको छ । निर्माण उद्योग जुमुराउने वित्तिकै सिमेन्ट, डन्डी, टायल, अन्य स्टिलजन्य सामाग्री, ढुंगा, माटो, गिट्टी, बालुवा लगायत निर्माण सामाग्रीको माग बढ्न थाल्छ ।

सिमेन्टको माग बढेपछि चुनढुंगा उत्खनन् बढेको छ । यस्तै, टायल, ब्लकजस्ता निर्माण सामाग्रीको माग बढ्ने वित्तिकै माटो, ढुंगा, गिट्टी, बालुवा लगायत सामाग्रीको उत्खनन बढ्न थाल्छ ।

निर्माण उद्योगसँग सिमेन्ट, डन्डी, पाइप एन्ड फिटिङ, फर्निचर, अन्य स्टिलजन्य सामाग्री, वायर, टायल, ब्लक, इँटा, गिट्टी, बालुवा, ढुंगालगायत निर्माण सामाग्रीसँग जोडिएका उद्योगहरु जोडिएका हुन्छन् । 

पछिल्लो समय सिमेन्ट र डन्डीको माग बढेको भन्दै उद्योगीहरुले मूल्य समेत बढाउँदै गइरहेको देखिन्छ । लामो समय निर्माण उद्योग ठप्प हुँदा सिमेन्ट, डन्डी, पाइप, टायल, ब्लक, इँटा, गिट्टी, बालुवाजस्ता उद्योगहरु पनि प्रभावित हुँदै आइरहेका थिए ।