चालु आर्थिक वर्षमा घरजग्गा क्षेत्रको वृद्धि २.७२% रहने प्रारम्भिक अनुमान, जीडीपीमा ८.२९% योगदान

काठमाडौं । चालु आर्थिक वर्ष ०८१÷८२ मा अघिल्लो वर्षको तुलनामा घरजग्गा कारोबार क्षेत्रको कुल मूल्य अभिवृद्धि सामान्य रुपले बढ्ने प्रारम्भिक अनुमान गरिएको छ । 

राष्ट्रिय तथ्यांक कार्यालयले राष्ट्रिय लेखासम्बन्धि वार्षिक तथ्यांक सार्वजनिक गर्दै चालु आवमा घरजग्गा कारोबार क्षेत्रको कुल मूल्य अभिवृद्धि वृद्धिदर २.७२ प्रतिशत हुने प्रारम्भिक अनुमान गरेको हो । 

आव ०८०/८१ मा यस क्षेत्रको वृद्धिदर २.४३ प्रतिशत रहने संशोधित अनुमान गरिएको छ भने आव ०७९/८० को तथ्यांक अनुसार उक्त वर्षमा यस क्षेत्रको वृद्धिदर २.९१ प्रतिशत कायम रहेको थियो ।

यस वर्ष घरजग्गाको कारोबारमा भएको सामान्य वृद्धि, निजी आवास तथा भाडाका क्रियाकलापमा भएको बढोत्तरीले यस क्षेत्रको वृद्धि अघिल्लो वर्षको तुलनामा सामान्य रुपमा बढ्ने प्रारम्भिक अनुमान गरिएको तथ्यांक कार्यालयले जनाएको छ ।

यस वर्ष देशको कुल गार्हस्थ्य उत्पादन (जीडीपी)मा यस क्षेत्रको योगदान ८.२९ प्रतिशत रहने अनुमान गरिएको छ ।

पछिल्लो समय देशभर घरजग्गा कारोबारसँगै कित्ताकाट, राजश्व संकलन लगायत बढ्दै गएको छ । चैतमा चालु आवकै सबैभन्दा उच्च घरजग्गा कारोबार भएको भूमि व्यवस्थापन तथा अभिलेख विभागको तथ्यांक छ ।

चैतमा देशभर ४९ हजार ८३२ लिखत पारित भए भने चार अर्ब ३९ करोड ४७ लाख रुपैयाँ राजश्व संकलन भएको छ । यसले वैशाख, जेठ र असार महिनामा पनि घरजग्गा कारोबार बढ्दै जाने सकरात्मक आशा देखाएको छ ।