०८१ लाई फर्केर हेर्दाः घरजग्गा किनबेच, राजश्व असुलीदेखि कित्ताकाटसम्म वृद्धि

काठमाडौं । वर्ष ०८१ रियल इस्टेट क्षेत्रका लागि त्यति उत्साहप्रद नरहे पनि सुखद भने बनेको छ । अघिल्लो वर्षको तुलनामा ०८१ मा घरजग्गा किनबेच, राजश्व संकलनदेखि कित्ताकाटसम्म बढेको छ ।

वर्षको अन्तिम महिना चैतको कारोबारमा चमक देखिएको छ, जसले नयाँ वर्ष ०८२ मा घरजग्गा कारोबार तंग्रिदै जाने शंकेत गरेको छ ।

वर्षको सुरुवाती महिनाहरु वैशाख, जेठ र असारमा घरजग्गा कारोबार उत्साहप्रद रहेपनि साउनदेखि निरन्तर ओरालो लागेको थियो । पछिल्ला महिनाहरुमा रियल इस्टेटमा प्रवाह हुने बैंक तथा वित्तीय संस्थाहरुको कर्जा पनि बढ्न थालेको छ ।

गत वर्ष ०८१ मा घरजग्गा कारोबार (लिखत पारित) सामान्य मात्र बढेको देखिन्छ । गत वर्ष देशभर ५ लाख ३१ हजार २९३ घरजग्गाको लिखत पारित भएको भूमि व्यवस्थापन विभागले जनाएको छ । अघिल्लो वर्ष ०८० मा ५ लाख २९ हजार ३०९ लिखत पारित भएका थिए । 

गत वर्ष सबैभन्दा धेरै जेठमा ६१ हजार १६१ घरजग्गाको लिखत पारित भएको थियो भने सबैभन्दा कम असोजमा ३० हजार ५२७ घरजग्गाको लिखत पारित भएको देखिन्छ । चैतमा ४९ हजार ८३२ लिखत पारित भएको भूमि विभागको तथ्यांक छ ।

अघिल्लो वर्षको तुलनामा गत वर्ष राजश्व संकलन पनि बढेको छ । अघिल्लो वर्ष देशभरका मालपोत कार्यालयबाट ४० अर्ब ३३ करोड रुपैयाँ राजश्व उठेकोमा गत वर्ष ४६ अर्ब ४५ करोड रुपैयाँ उठेको छ ।

गत वर्ष सबैभन्दा धेरै राजश्व असार महिनामा पाँच अर्ब दुई करोड रुपैयाँ उठेको थियो । अरु महिना उतारचढाव आइरहेको राजश्व उठ्ती चैतमा फेरी बढेर चार अर्ब ३९ करोड रुपैयाँ पुगेको छ ।

गत वर्ष देशभर १३ लाख एक हजार ५७४ कित्ताकाट भएका छन् । यो संख्या पनि अघिल्लो वर्षको तुलनामा बढोत्तरी नै हो । ०८० सालमा देशभर १२ लाख ३४ हजार ५९ कित्ताकाट भएको देखिन्छ । गत वर्ष सबैभन्दा धेरै कित्ताकाट चैतमा एक लाख ३१ ह्जार ५५८ भएका छन् ।

अपार्टमेन्ट कारोबारका हिसावले पनि वर्ष ०८१ सन्तोषजनक नै रह्यो । ०८१ मा देशभर ४७१ युनिट अपार्टमेन्ट किनबेच भएका छन् । यो संख्या अघिल्लो वर्षको तुलनामा १२२ युनिट बढी हो । वर्ष ०८० मा देशभर ३४९ युनिट अपार्टमेन्ट किनबेच भएको विभागको तथ्यांक छ ।