साढे ९ प्रतिशतले घट्यो काठमाडौं महानगरको आन्तरिक राजश्‍व

काठमाडौं । मन्दीको असर काठमाडौं महानगरपालिकाको आन्तरिक राजश्‍व संकलनमा पनि देखिएको छ । चालू आवको पहिलो साउनदेखि माघसम्म १० महिनामा गत आवको यसै अवधिको तुलनामा आन्तरिक राजश्‍व संकलन ९.४७ प्रतिशतले घटेको छ । 

चालू आवको १० महिनामा विभिन्न शिर्षकमा ४० करोड २२ लाख रुपैयाँ आन्तरिक राजश्‍व संकलन भएको छ । जबकी, गत वर्षको सोही अवधिमा ४४ करोड ४२ लाख रुपैयाँ आन्तरिक राजश्‍व संकलन भएको थियो ।

तर, घरजग्गा रजिष्ट्रेसन दस्तुर बाँडफाँडबाट प्राप्त हुने राजश्‍व र बाँडफाँटबाटै प्राप्त हुने सवारीसाधन कर बढेपछि महानगरको कुल राजश्‍व संकलन भने १३.१३ प्रतिशतले बढेको देखिन्छ ।

यो अवधिमा कुल राजश्‍व ६१ करोड ३५ लाख रुपैयाँ उठेको छ । गत वर्षको यसै अवधिमा ५४ करोड २४ लाख रुपैयाँ राजश्‍व उठेको थियो ।

कुन शिर्षकमा कति कर ?

यस वर्ष सम्पत्ती, बहाल तथा पट्टावापतको आयमा लाग्‍ने कर एक रुपैयाँमा पनि उठेको छैन । सम्त्ती कर २३ प्रतिशतले घटेर चार करोड ३३ लाखमा खुम्चिएको छ । भूमि तथा मालपोत कर पाँच लाख ४५ हजार, घरबहाल कर १८ करोड पाँच लाख रुपैयाँ उठेको छ । 

सवारी साधन कर ८ हजार, अन्य व्यक्तिगत आन्तरिक अनुदान २२ लाख ६५ हजार, पर्यटन शुल्क ९८ लाख, अन्य सेवा शुल्क दुई करोड ४५ लाख, शिक्षा क्षेत्रको आम्दानी ३७ लाख, अन्य प्रशासनिक शुल्क दुई करोड ४३ लाख, नक्सापास दस्तुर पाँच करोड ५५ लाख, सिफारिस दस्तुर ८१ लाख, व्यवसाय रजिष्ट्रेसन दस्तुर चार करोड ३८ लाख रुपैयाँ उठेको छ ।