गत वर्षको फागुनको तुलनामा भने यो फागुनमा कारोबार १० हजारले बढेको छ । गत फागुनामा ४० हजार ७३७ घरजग्गा किनबेच भएका थिए ।
काठमाडौं । चालू वर्षकै अघिल्लो महिना माघको तुलनामा फागुनमा घरजग्गा कारोबार त्यति बढ्न सकेन ।
फागुनमा देशैभर ५० हजार ९९८ घरजग्गाको लिखत पारित भएको छ । यो संख्या माघको भन्दा ७७ युनिट बढी हो । माघमा ५० हजार ७३४ घरजग्गाको लिखत पारित भएको भूमि व्यवस्थापन तथा अभिलेख विभागको तथ्यांक छ ।
गत वर्षको फागुन महिनाको तुलनामा भने यो फागुनमा घरजग्गा कारोबार १० हजारले बढेको छ । गत फागुनामा देशैभर ४० हजार ७३७ घरजग्गा किनबेच भएका थिए ।
घरजग्गा कारोबार खासै नबढे पनि राजश्व भने सामान्य बढेको छ । फागुनमा तीन अर्ब ५९ करोड रुपैयाँ राजश्व संकलन भएको छ । माघमा तीन अर्ब ३७ करोड रुपैयाँ मात्र राजश्व संकलन भएको तथ्यांक छ । गत फागुनमा तीन अर्ब ५७ करोड राजश्व संकलन भएको थियो ।
इनरुवामा सबैभन्दा धेरै कारोबार
फागुन महिनामा सबैभन्दा धेरै घरजग्गा कारोबार सुनसरीको इनरुवा मालपोत कार्यालयबाट भएको देखिन्छ । एक महिनामा इनरुवाबाट दुई हजार ६ घरजग्गाको लिखत पारित भएको छ ।
धनुषाको जनकपुर मालपोतबाट १९ सय ९७, झापाको भद्रपुर मालपोतबाट १८ सय ५०, मोरङको बेलवारी मालपोतबाट १६ सय ४३, सप्तरीको राजविराजबाट १३ सय ६५, महोत्तरीको जलेश्वरबाट १२ सय ८४, सर्लाहीको मलंगवाबाट ११ सय १४ घरजग्गाको लिखत पारित भएको छ ।
यस्तै, सिराहाबाट एक हजार ८६, कपिलवस्तुको तौलिहवाबाट एक हजार ३५, मोरङकै विराटनगर मालपोतबाट एक हजार ७ घरजग्गाको लिखत पारित भएका छन् ।
सबैभन्दा धेरै घरजग्गा किनबेच हुने प्रमुख १० मालपोत कार्यालयभित्र काठमाडौंका उपत्यकाका मालपोत कार्यालय पर्न छाडेका छन् । पछिल्लो समय पूर्वी तराईका मालपोत कार्यालयले अरु मालपोतलाई पछाडि पार्न थालेको देखिन्छ ।
मुस्ताङमा ६ वटा किनबेच
हिमाल पारिको जिल्ला भनेर चिनिने मुस्ताङ जिल्ला भरिमै फागुनमा ६ वटा घरजग्गाको लिखत पारित भएको छ । डोल्पा जिल्लामा ११, मनाङ जिल्लामा १३, हुम्ला जिल्लामा १४, बझाङमा ३७, मुगुमा २० घरजग्गाको लिखत पारित भएको भूमि व्यवस्थापन विभागले जनाएको छ ।
उपत्यकामा ४२ सय कारोबार
काठमाडौं उपत्यकाका नौवटा मालपोत कार्यालयबाट एक महिनामा चार हजार २०३ घरजग्गाको लिखत पारित भएका छन् । लगनखेलबाट ९३१, गोटीखेलबाट २४, भक्तपुरबाट ९७१, डिल्ली बजारबाट २११, चावहिलबाट ४५१, कलंकीबाट ७०७, साँखुबाट ४०२, टोखाबाट ३१५, नुवाकोटबाट १९१ घरजग्गाको लिखत पारित भएको देखिन्छ ।