६ महिनामा २६७ अपार्टमेन्ट किनबेच

काठमाडौं । अपार्टमेन्टको उपलब्धता कम हुँदै गएपछि खरिद बिक्री पनि घट्दै गइरहेको छ । चालु आर्थिक बर्षको पहिलो ६ महिनामा देशभर जम्मा दुई सय ६७ अपार्टमेन्ट बिक्री भएका छन् । 

पुस महिनामा सबैभन्दा कम ३० युनिट अपार्टमेन्ट मात्र बिक्री भएको भूमि सुधार तथा व्यवस्था विभागले जनाएको छ ।

बढ्दै गइरहेको कोरोना महामारी र तरलता अभावकै बिच पनि अरु घरजग्गा किनबेचमा उछाल आइरहँदा अपार्टमेन्ट खरिद बिक्रीमा सुस्तता छाएको छ ।

साउन महिनामा ५२ युनिट अपार्टमेन्ट खरिद बिक्री हुँदा भदौमा ५६, असोजमा ५३, कार्तिकमा ३५, मंसिरमा ४१ र पुसमा ३० युनिट अपार्टमेन्ट खरिद बिक्री भएको विभागको तथ्यांकमा देखिन्छ ।

२०७२ सालको भूकम्पपछि हाईराइज अपार्टमेन्ट आउन सकेका छैनन् । भूकम्पले गगनचुम्बी अपार्टमेन्ट हल्लाउँदा केही बर्ष मान्छेहरु ठूला भवनमा बस्‍न डराए । सरकारले पनि भवन मापदण्ड परिवर्तन गरेर ठूला भवन निर्माणमा कडाई गर्यो ।

अहिले मान्छेले भूकम्पको घाउ भुलिसकेका छन् । र, हाईराइज अपार्टमेन्टमा बस्‍न का लागि फ्ल्याट खोजिरहेका छन् । तर, सरकारको अव्यवहारिक नीतिका कारण अपार्टमेन्ट बन्‍न नसकेको आवास विकासकर्ता कम्पनीहरुले बताइरहेका छन् ।

पछिल्लो समय आधा दर्जन हाराहारी अपार्टमेन्ट बनिरहेका छन् । तर, ती अपार्टमेन्ट अझै पुरा भइसकेका छैनन् । सीइ कन्स्ट्रक्सनले थापाथलीमा, गोल्यान ग्रुपले टेकुमा, चौधरी ग्रुपले कुपण्डोल हाइटमा, गुण ग्रुपले विभिन्‍न ठाउँमा अपार्टमेन्ट निर्माणको तयारी थालेका छन् ।  

महिना	अपार्टमेन्ट किनबेच
साउन	५२
भदौ	५६
असोज	५३
कार्तिक	३५
मंसिर	४१
पुस	३०
कुल	२६७