ललितपुरको गोदावरीमा पनि खुल्यो कित्ताकाट, महानगर अन्तिम गृहकार्यमा

काठमाडौं । ललितपुरको गोदावरी नगरपालिका क्षेत्रमा जमिको वर्गीकरण भएको छ । आफ्नो नगरभित्र पर्ने जग्गा–जमिन १८ कात्तिकमा वर्गीकरण गरिसकेको नगरपालिकाका प्रवक्ता मिलन सिलवालले बताए ।

‘यस क्षेत्रमा कृषि र गैरकृषि भूमि वर्गिकरण गरी २२ कात्तिकमै मालपोत कार्यालयलाई पत्राचार गरिसकेका छौं’ उनले भने, ‘अब रोक्का रहेको कित्ताकाट र अंशबण्डा पनि फुकुवा भइसकेको छ ।’ 

गोदावरी नगरभित्र पनि कृषियोग्य भूमि कमै भेटिएको छ । अधिकांश जग्गा आवासीय र खानी क्षेत्रमा वर्गीकरण भएको प्रवक्ता सिलवालले बताए । ‘कृषियोग्य भूमि भनेर ७ र ९ नम्बर वडाका केही भागहरु परेका छन्, अरु जमिनलाई आवासीय र खानी क्षेत्रमा वर्गीकरण गरिएको छ’ उनले भने ।

ललितपुर महानगरमा अध्ययन हुँदै

ललितपुर महानगरपालिकाभित्र पर्ने जग्गाको पनि वर्गीकरण कार्य अन्तिम चरणमा पुगेको बताइएको छ ।

ललितपुर महानगरका सम्पूर्ण वडाले आफ्नो क्षेत्रमा पर्ने जग्गा कृषि र गैरकृषि भनेर सिफारिस गरिसकेका छन् । वडाले गरेको सिफारिस स्थानीय भूउपयोग कार्यान्वयन उपसमितिले अध्ययन तथा छलफल गरिरहेको महानगरका प्रवक्ता राजु महर्जनले बताए ।

उपसमितिले कार्यापालिकामा सिफारिस गरेपछि बैठक बसेर जग्गाको वर्गीकरणबारे निर्णय हुने उनको भनाई छ । ‘कार्यापालिकाले निर्णय गर्नासाथ मालपोत कार्यालयलाई पत्राचार हुनेछ, त्यसपछि रोकिएको कित्ताकाट र अंशबण्डा फुकुवा हुनेछ’ उनले भने ।

महालक्ष्मीमा एउटा वडाको विरोध

यस्तै, ललितपुरकै महालक्ष्मी नगरपालिकामा भने विवादका कारण भूउपयोग वर्गीकरणको निर्णय कार्यान्वयन हुन सकेको छैन । 

नगरपालिकाले पहिल्यै आफ्नो क्षेत्रमा पर्ने जग्गा जमिन कृषि र गैरकृषिमा वर्गीकरण गरेको थियो ।

तर, वडा नम्बर ६ बाट वर्गीकरणबारे विरोध आएपछि निर्णय कार्यान्वयन नभई पेन्डिङमा रहेको नगरपालिकामा सूचना अधिकारी लवकुमार गुप्ताले बताए ।

विरोध भएको वडामा थप अध्ययन गरी विवाद सल्टाएर छिट्टै जग्गाको वर्गीकरण गरी मालपोत कार्यालयमा सिफारिस गरिने उनले बताए ।

Photo: Annapurna Post