घरजग्गा किनबेचः बेलवारी र इनरुवालाई पछाडि पार्दै बाँके मालपोत बन्यो पहिलो

काठमाडौं । धेरै घरजग्गा किनबेच गराउनेमा अग्रस्थानमा रहँदै आएका सुनसरीको इनरुवा र मोरङको बेलवारी मालपोत कार्यालयलाई बाँकेको नेपालगञ्‍जस्थित मालपोत कार्यालयले पछाडि पारेको छ ।

मंसिरमा पश्चिम क्षेत्रको बाँके जिल्लामा १३ सय ८२ घरजग्गा किनबेच भएका छन् । जबकी पूर्वका इनरुवामा १२ सय ३३ र बेलवारी मालपोत कार्यालयबाट एक हजार २४ घरजगा किनबेच भएका छन् ।  

यो जिल्लागत नभएर मालपोतगत कारोबार हो । यदि सुनसरीमा रहेका दुईवटा मालपोत र मोरङमा रहेका तीनवटा मालपोत कार्यालयको कारोबार तथ्यांक जोड्ने हो यिनै जिल्ला अगाडि आउँछन् । सबैभन्दा अग्रस्थानमा काठमाडौं आउँछ । 

मंसिरमा काठमाडौंका ६ वटा मालपोतबाट कुल १९ सय आठ घरजग्गा किनबेच भएका छन् । यस्तै, सुनसरी जिल्लामा कुल १६ सय १८ र मोरङ जिल्लामा कुल १८ सय २० घरजग्गा किनबेच भएको भूमि व्यवस्थापन तथा अभिलेख विभागको तथ्यांक छ ।

अघिल्लो महिना सबैभन्दा धेरै घरजग्गा किनबेच गराउने धनुषाको जनकपुर मालपोत कार्यालयको मंसिरको तथ्यांक शून्य छ । झापाका भद्रपुर र दमक मालपोतबाट १२ सय ७१ घरजग्गा किनबे भएका छन् । 

मंसिरमा चितवन जिल्लामा रहेका चारवटा मालपोत कार्यालयबाट १२ सय ७२ घरजग्गा किनबेच भएका छन् । रुपन्देहीका बुटवल र भैरहवा मालपोतबाट १३ सय ३४ घरजग्गा किनबेच भएको देखिन्छ । दाङ जिल्लाका तीनवटा मालपोतबाट १६ सय ६१ घरजग्गा किनबेच भएका छन् । धनगढीका दुईवटा मालपोतबाट एक हजार ७६ घरजग्गा किनबेच भएका छन् ।

सुनसरी, मोरङ, झापा, धनुषा, बाँके, धनगढी लगायत जिल्लामा रहेका मालपोत कार्यालय लामो समयदेखि धेरै घरजग्गाको लिखत पारित गराउनेमा अग्रस्थानमा रहँदै आएका छन् । घरजग्गाका परम्परागत हटस्पट मानिनले काठमाडौं उपत्यका, पोखरा, रुपन्देही, चितवन पछाडि पर्न थालेका छन् ।