आर्थिक सर्वेक्षण भन्छ– देशभर ४४ नयाँ सहरको पूर्वाधार निर्माण सुरु भइसक्यो

काठमाडौं । सरकारले देशभर २७ नयाँ सहर र १७ स्मार्ट सहरको पूर्वाधार निर्माण सुरु भइसकेको बताएको छ । अहिलेसम्म देशका विभिन्‍न ५८ ठाउँमा नयाँ सहर घोषणा भइसकेका छन् । 

सहरको एकीकृत विकास गर्न एक सय ८५ नगरपालिकाको एकीकृत सहरी विकास योजना तयार गरिएको अर्थमन्त्री डा. प्रकाशशरण महतले आइतबार सार्वजनिक गरेको ‘आर्थिक सर्वेक्षण ०७९/८०’ मा उल्लेख छ ।

०७९ फागुनसम्म नयाँ सहरसम्बन्धी कार्यक्रममा कालोपत्रे ८ हजार ६७ किमी, ढलान सडक ४ हजार ४२ किमी, ढल तथा नाला निर्माण २८ हजार ६३६ किमी र ट्रयाक खोल्ने तथा स्तरोन्‍नती कार्य ४८ हजार ६०७ किमी सम्पन्‍न भएको बताइएको छ ।

सघन सहरी विकास कार्यक्रम अन्तर्गत तराई–मधेशका जिल्ला सदरमुकामका पूर्वाधार कार्यक्रमबाट आर्थिक वर्ष ०७८/७९ मा १५० किलोमिटर सडक स्तरोन्नती र २ सय किलोमिटर ड्रेन निर्माण सम्पन्‍न भइ ०७९ फागुनसम्म एक हजार ३३५ किलोमिटर सडक स्तरोन्‍नती र ड्रेन निर्माण कार्य सम्पन्‍न भएको छ ।

बागमती नदीमा सुख्खायाममा समेत न्यूनतम बहाव कायम राख्‍ने उद्देश्यले धाप ड्याम निर्माण सम्पन्‍न गरी प्रयोगमा ल्याइसकिएको छ ।

आव ०७९/८० को फागुनसम्म पुष्पलाल राजमार्ग र हुलाकी राजमार्गका २७ स्थानमा नयाँ सहर विकास कार्यक्रम अन्तर्गत २.२ किलोमिटर सडक कालोपत्रे, ७.१ किलोमिटर सडक ढलान र ५.७ किलोमिटर सतह नाला निर्माण कार्य सम्पन्‍न भएको बताइएको छ ।