स्टक सकिँदा निरन्तर घट्दै अपार्टमेन्ट किनबेच

काठमाडौं । बहुतले आवास परियोजना (अपार्टमेन्ट) को स्टक सकिदै जाँदा किनबेच पनि निरन्तर ओरालो लागिरहेको छ । कात्तिकमा २२ युनिट अपार्टमेन्ट मात्रै किनबेच भएका छन् ।

भूकम्पयता नयाँ अपार्टमेन्ट निर्माण सम्पन्‍न भइनसकेका र पुराना अपार्टमेन्ट स्टक सकिँदै गइरहेका छन् । पछिल्लो समय देशैभर नयाँ अपार्टमेन्ट निर्माण सुरु गरिएता पनि अझै सम्पन्‍न भइसकेका छैनन्, जसले गर्दा पुरानै अपार्टमेन्ट किनबेच भइरहेका छन् ।

कात्तिकमा १८ युनिट अपार्टमेन्ट काठमाडौं र चार युनिट अपार्टमेन्ट ललितपुरमा किनबेच भएको भूमि व्यवस्थापन विभागले जनाएको छ । कात्तिकमा पोखरा, वीरगञ्‍ज, झापा लगायत शहरमा एउटै अपार्टमेन्ट किनबेच भएनन् ।

पछिल्ला महिनामा अपार्टमेन्ट किनबेच निकै न्युन संख्यामा हुने गरेको विभागको तथ्यांकले देखाउँछ । वैशाखदेखि कात्तिकसम्म ७ महिनामा २२७ अपार्टमेन्ट किनबेच भएका छन् ।

वैशाखमा ३० युनिट अपार्टमेन्ट किनबेच हुँदा जेठमा २९ युनिट, असारमा ३३ युनिट, साउनमा ३० युनिट, भदौमा ४५ युनिट अशोजमा ३८ युनिट र कात्तिकमा २२ युनिट अपार्टमेन्ट किनबेच भएका छन् ।

देशभर मासिक हजारौंको संख्यामा सिंगल युनिट घरजग्गाहरु किनबेच हुँदा हाइराइज आवासको बिक्री ५० पनि नाघ्‍न सकेको देखिदैन ।

अहिले काठमाडौं, ललितपुर, भक्तपुर, पोखरा, रुपन्देही, वीरगञ्‍ज, विराटनगर, झापा लगायत ठाउँमा ठूलो संख्यामा अपार्टमेन्ट निर्माण सुरु गरिएका छन् । तर, कोभिड महामारी र त्यसपछि निम्तिएको मन्दीले सबै परियोजना निर्माण प्रभावित भएका छन् ।

त्यसो त कोभिड महामारी र मन्दीका कारण सिंगल युनिट घरका हाउजिङ परियोजना निर्माणमा समेत ढिलाइ भइरहेको छ । देशका प्रमुख शहरहरुमा निर्माण सुरु गरिएका र निर्माणको तयारी थालिएका दर्जनौं हाउजिङ परियोजना अहिले अलपत्र अवस्थामा छन् ।