‘लेमन ट्री प्रिमियर’ बन्यो बुढानिलकण्ठ क्षेत्रकै पहिलो पाँचतारे होटेल

काठमाडौं । उपत्यकाको उत्तरी भेगमा अवस्थित बुढानिलकण्ठमा पाँचतारे होटेल ‘लेमन ट्री प्रिमियर’ सञ्‍चालनमा आएको छ । साढे दुई अर्ब लगानीमा खुलेको होटेल बुढानिलकण्ठ क्षेत्रकै पहिलो पाँचतारे बन्‍न सफल भएको छ ।

१ माघमा होटेलको सफ्ट लञ्‍च गरिएको छ । बुढानिलकण्ठ हेरिटेज होटेलको व्यवस्थापनमा भारतको प्रख्यात हस्पिटालिटी ब्रान्ड ‘लेमन ट्री प्रिमियर’ आएको छ । होटेल पनि ‘लेमन ट्री प्रिमियर’ ब्रान्डबाटै सञ्‍चालनमा ल्याइएको छ । 

निर्माण सुरु भएको चार वर्षमा सञ्‍चालनमा आएको होटेलमा बाबुकाजी कार्की, अम्बिका प्रसाद पौडेल, डा. राजेन्द्र केसी, हरिप्रसाद पाठक, दीपक पाण्डे, नवराज बुर्लाकोटी, जनक भट्ट, दिपेन्द्र श्रेष्ठ र जलेश्‍वर पाण्डेको लगानी रहेको छ । 

शिवपुरी राष्ट्रिय निकुञ्‍जको काखमा अवस्थित साढे १२ रोपनी क्षेत्रफलमा फैलिएको होटेलमा पाँच प्रकारका १०२ कोठा छन् । होटेलमा तीनवटा मिटिङ रुम, रुफ टप रेष्टुरेन्ट एन्ड बार, हेल्थ क्लब, स्पा, योगा तथा ध्यान केन्द्र, ब्यांक्वेट हल, रेष्टुराँ, क्यासिनो लगायत सुविधाहरु रहने छन् । क्यासिनो भने केही समयपश्‍चात सञ्‍चालनमा आउने बताइएको छ ।

हाई प्रोफाइलहरुको आकर्षक बसोबास क्षेत्र मानिने बुढानिलकण्ठमा पहिलो पटक पाँचतारे होटेल सञ्‍चालनमा आएको हो । जसले बुढानिलकण्ठको आवासीय क्षेत्रको पहिचान बदलेर लक्जरी होटेलको गन्तव्य भनेर चिनाउने छ । 

केही महिनामै अर्को पाँचतारे ‘होली डे इन’ पनि सञ्‍चालनमा आउँदै छ । करिव तीन अर्ब रुपैयाँ लगानीमा होटेल तयार भइरहेको छ । इन्टरकन्टिनेन्टल होटेल ग्रुप (आइएचजी)को चर्चित ब्रान्ड होली डे इन बुढानिलकण्ठको होेटेल व्यवस्थापनमा आउने पक्कापक्की भइसकेको छ ।

यस्तै, सूर्य नेपालले पनि बुढानिलकण्ठमै पाँच अर्बभन्दा बढी लगानी गरेर लक्जरी पाँचतारे होटेल सञ्‍चालनको तयारी थालेको छ । होटेलको प्रस्तावित लगानी अनुमोदन भई उद्योग विभागमा दर्ता समेत भइसकेको छ ।

बुढानिलकण्ठ क्षेत्रमा अरु आधा दर्जन हाराहारी राम्रा होटेल तथा रिसोर्ट सञ्‍चालनमा छन् ।