पुसमा यस आर्थिक वर्षकै धेरै अपार्टमेन्ट किनबेच

काठमाडौं । पुस महिनामा अपार्टमेन्ट किनबेच पनि बढेको छ । बैंकको कर्जा प्रवाह र घरजग्गा कारोबार बढेसँगै अपार्टमेन्ट कारोबार पनि बढ्न थालेको हो ।

पुसमा विभिन्न ठाउँमा ७१ युनिट अपार्टमेन्ट किनबेच भएका छन् । यो कारोबार संख्या चालु आर्थिक वर्षकै सबैभन्दा धेरै हो ।

भूमि व्यवस्थापन तथा अभिलेख विभागका अनुसार आर्थिक वर्षको पहिलो महिना साउनमा १६ युनिट अपार्टमेन्ट किनबेच भएका थिए भने भदौमा २४, अशोजमा २३, कार्तिकमा २९, मंसिरमा ६३ युनिट अपार्टमेन्ट किनबेच भएका थिए ।

पुसमा कलंकी मालपोतबाट ५३ युनिट, डिल्लीबजार मालपोतबाट पाँच युनिट, चावहिल मालपोतबाट चार युनिट, लगनखेल मालपोतबाट पाँच युनिट अपार्टमेन्ट किनबेच भएका छन् । 

उपत्यकाबाहिर पर्सा (बिरगञ्ज)मा तीन युनिट अपार्टमेन्ट किनबेच भएका छन् भने कास्कीमा एक युनिट अपार्टमेन्ट किनबेच भएको देखिन्छ ।

पछिल्लो समय घरजग्गा कारोबार बढ्न थालेको छ । समग्र घरजग्गा कारोबार बढ्दा अपार्टमेन्ट किनबेच पनि स्वतः बढ्ने व्यवसायी बताउँछन् । यतिबेला नयाँ अपार्टमेन्ट भन्दा पनि पुरानै अपार्टमेन्ट किनबेच भइरहेका छन् ।