मंसिरमा देशभर ६१ हजार घरजग्गा, ८७ अपार्टमेन्ट किनबेच

काठमाडौं । मंसिर महिनामा हाईराइज आवासिय बिल्डिङका  ८७ अपार्टमेन्ट खरिद बिक्रीभएका छन् । भूमि व्यवस्थापन तथा अभिलेख विभागका अनुसार काठमाडौं उपत्यका र पोखरामा निर्माण गरिएका अपार्टमेन्ट बिक्री भएका हुन् । 

अपार्टमेन्ट युनिटको स्टक सकिँदै जाँदा बिक्री संख्या पनि घट्दै गइरहेको छ । ०७२ सालको भूकम्पपछि अपार्टमेन्ट निर्माण नहुँदा स्टक अपार्टमेन्ट सकिदै गइरहेको आवास विकासकर्ता बताउँछन् ।

विभागका अनुसार मंसिरमा पोखरामा ३५ अपार्टमेन्ट किनबेच भएका छन् । ललितपुरको लगनखेलस्थित मालपोत कार्यालयबाट ३० अपार्टमेन्ट किनबेच हुँदा डिल्लीबजार मालपोतबाट १०, चावहिल मालपोतबाट ४, कलंकी मालपोतबाट ३ र टोखा मालपोत कार्यालयबाट ५ अपार्टमेन्ट किनेबच भएका छन् ।

पछिल्लो समय उपभोक्ताले हाईराइज भवनका अपार्टमेन्ट खरिद गर्न चाहे पनि अपार्टमेन्ट युनिट स्टक छैनन् । भूकम्पपछि अपार्टमेन्ट निर्माण नहुँदा स्टक सकिँदै गइरहेको सीई कन्स्ट्रक्सनका अध्यक्ष बिजय राजभण्डारी बताउँछन् ।

मान्छेले भूकम्पको घाउ बिर्सिदै गएर अपार्टमेन्ट खोजी गर्न थालेपछि अवास विकास कम्पनीहरुले काठमाडौं उपत्यका, भैरहवा र पोखरालगायत ठाउँमा एक दर्जन अपार्टमेन्ट निर्माण सुरु गरेका छन् । 

६१ हजार ४ सय ५१ घरजग्गाकिनबेच

कोभीड महामारीबीच मंसिर महिनामा देशघर घरजग्गाको कारोबारमा उछाल आएको छ । विभागका अनुसार अनलाइन प्रणाली लागू भएका देशभरका १०८ मालपोत कार्यालयबाट मंसिरमा ६१ हजार ४ सय ५१ घरजग्गा किनबेच भएका छन् ।

काठमाडौं उपत्यकामा ललितपुर लगनखेल मालपोत कार्यालयबाट १८ सय ४६, ललितपुर गोटीखेल मालपोतबाट ४०, भक्तपुरबाट १७ सय ५, डिल्लिी बजारबाट १६७, चावहिलबाट ६९९, कलंकीबाट १२ सय ७६, साँखुबाट ६३८, मनमैजुबाट ५०९ र टोखामालपोत कार्यालयबाट २७१ घरजग्गा किनबेच भएका छन् ।

यस्तै मोरङको विराटनगर मालपोतबाट १७ सय ९०, मोरङको बेलबारी मालपोतबाट १९ सय ८६, सप्तरीको राजविराज मालपोतबाट १५ सय ९४ घरजग्गा किनबेच भएको विभागको तथ्यांकमा उल्लेख छ ।

विभागका अनुसार मंसिरमा ५३ हजार २८१ घरजग्गा रोक्का हुँदा ३२ हजार २६० घरजग्गा फुकुवा भएका छन् ।

५ अर्ब राजश्व संकलन

मंसिर महिनामा घरजग्गा किनबेच, रोक्का फुकुवा, रजिष्ट्रेसन, पुँजीगत लाभकर लगायत शिर्षकबाट ५ अर्ब १४  करोड ४८ लाख रुपैयाँ संकलन भएको छ । 

विभागका अनुसार सेवाकर ३३ करोड १४ लाख, रजिष्ट्रेसन दस्तुर २ अर्ब ९४ करोड १८ लाख, पुँजीगत लाभकर १ अर्ब २१ करोड रुपैयाँ संकलन भएको छ । यो राजश्व रकम अनलाइन प्रणाली लागू भएका १०८ मालपोत कार्यालयबाट संकलित हो ।

नेपालमा १२६ मालपोत कार्यालय सञ्चालनमा छन् जसमध्ये १८ मालपोत कार्यालयमा अझै अनलाइन प्रणाली लागू भएको छैन । विभागले छिट्टै बाँकी मालपोत कार्यालयलाई पनि अनलाइन प्रणालीमा लैजाने बताएको छ । अनलाइन प्रणाली लागू नभएका मालपोत कार्यालयहरुबाट ठूलो कारोबार हुँदैन ।