चितवनमा साढे दुई तले घर बनाउँदा कति खर्च लाग्छ ?

के तपाईं चितवनमा घर बनाउँदै हुनुहुन्छ ? घर बनाउन सुरु गर्नुभन्दा अघि तपाईंलाई कति खर्च लाग्छ भनेर अनुमानित लागत थाहा हुनुपर्छ । यसका लागि सम्बन्धित क्षेत्रका इञ्जिनियरसँग परमार्श लिन सकिन्छ ।

यसअघि हामीले काठमाडौं उपत्यकाभित्र एक तले र अढाई तले घर बनाउँदा कति खर्च लाग्छ भनेर चर्चा गरिसकेका छ । हामी चितवन जिल्लामा एक हजार स्क्वयार फिटमा अढाई तलाको मध्यम खालको घर बनाउन कति खर्च लाग्छ भनेर चर्चा गर्न गइरहेका छौं । 

हामीले चर्चा गर्न लागेको घरमा ग्राउन्ड र पहिलो तलामा ४/४ कोठा र टपमा दुईवटा कोठा र एउटा बाथरुम हुनेछन् । चितवनको निर्माण कम्पनी एसवान ग्रुप अफ कम्पनीसँग कुराकानी गरेर अढाई तलाको घर निर्माणमा लाग्ने खर्चको अनुमानित लागत निकालेका छौं ।

सिमेन्ट : ८ लाख

घर बनाउँदा दुई प्रकारको सिमेन्ट प्रयोग गरिन्छ, ओपीसी र पीपीसी । सामन्यतया बिम र ढलानमा ओपीसी सिमेन्ट प्रयोग गरिन्छ भने गाह्रो लगाउन र प्लास्टर गर्न पीपीसी सिमेन्ट प्रयोग गरिन्छ । ओपीसी सिमेन्टको तुलनामा पीपीसी अलि सस्तो पनि हुन्छ । 

अढाई तलाको घर बनाउँदा एक हजार बोरा सीमेन्ट खपत हुन्छ जसमध्ये ५ सय बोरा ओपीसी र ५ सय बोरा पीपीसी । एसवान ग्रुप अफ कम्पनीका अध्यक्ष सुरज न्यौपानेका अनुसार तपाईंले चितवनमा अढाई तलाको घर बनाउँदा करीव ८ लाख रुपैयाँ सिमेन्टमा मात्र खर्च गर्नुपर्ने हुन्छ ।

बजारमा सिमेन्टको भाउ पनि तलमाथि भइरहन्छ । अहिले कोभीड महामारीका कारण निर्माण सुस्ताउँदा सिमेन्टको मूल्य पनि सस्तिाएको छ ।  

डन्डी : १२ लाख 

बलियो पक्की घर बनाउँदा फलामै डन्डी नभई हुँदैन । निर्माण व्यवसायी न्यौपानेका अनुसार अढाई तलाको घर बनाउँदा डन्डीमा मात्र झन्डै १२ लाख रुपैयाँ खर्च हुन्छ । 

बालुवा : २ लाख ५० हजार

घर बनाउँदा माटो नमिसिएको सफा बालुवा प्रयोग गर्नुपर्छ । सफा बालुवाको मूल्य अलि महंगो हुन्छ, माटो मिसिएको बालुवा अलि सस्तो मूल्यमा पनि पाउन सक्छ तर निर्माण बलियो हुँदैन । चितवनका निर्माण व्यवसायीहरुका अनुसार अढाई तलाको घर बनाउँदा साढे दुई लाख बालुवामा खर्च हुन्छ ।

गिट्टी : २ लाख ५० हजार

घर बनाउन गिट्टी नभई नहुने निर्माण सामाग्री हो । जति राम्रो गिट्टी हुन्छ त्यति नै गिट्टी, बालुवा र सिमेन्टको घोल राम्रो हुन्छ । त्यसैले गिट्टी किन्दा गुणस्तरमा ध्यान दिनैपर्छ ।

अढाई तलाको घर बनाउँदा करीव ८ टिप्पर गिट्टी खपत हुन्छ । अढाई तलाको घर बनाउँदा गिट्टीमा पनि साढे दुई लाख रुपैयाँ खर्च हुने न्यौपाने बताउँछन् । 

इँटा : ७ लाख 

घर बनाउँदा इँटा चाहियो नै । अढाई तलाको घरमा करीव ५० हजार पिस पोलेको रातो इँटा चाहिने बताइन्छ । न्यौपानेका अनुसार तपाईंले अढाई तलाको घर बनाउँदा इँटामा मात्रै ७ लाख रुपैयाँ खर्च गर्नुपर्ने हुन्छ ।

तर, पछिल्लो समय निर्माण क्षेत्रमा भएको विकाससँगै पोलेका इँटाको बिकल्पमा नयाँ प्रविधिका इँटा बजारमा आइसकेका छन् । पोलेका रातो इँटाको विकल्प एसीसी ब्लक र इन्टरलक इँटा हुन सक्छन् जसको मूल्य पनि कम पर्न जान्छ र गुणस्तर पनि अत्यन्तै राम्रो छ । 

यदि तपाईंले पोलेको इँटाको सट्टामा एसीसी ब्लक र इन्टरलक इँटा प्रयोग गर्नुभयो भने २० देखि २५ प्रतिशतसम्म सस्तो पर्न जान्छ । यी इँटाको गाह्रो लगाउँदा र प्लास्टर गर्दा पनि सिमेन्ट र बालुवाको मसला पनि कम खपत हुन्छ ।

काठको झ्याल/ढोका : ५ लाख

निर्माण व्यवसायी न्यौपानेका अनुसार अढाई तलाको घरमा काठको झ्याल ढोका राख्दा करीव ५ लाख रुपैयाँ हाराहारी खर्च लाग्छ । तर, पछिल्लो समय युपिभिसी र आल्मुनियमका झ्यालको प्रयोग बढ्दै गइरहेको छ । यदि तपाईंले काठको झ्यालको सट्टा युपिभिसी वा आल्मुनियमको झ्याल राख्नुभएमा खर्च कम लाग्न सक्छ । 

इलेक्ट्रिक एन्ड प्लम्बिङ : ७ लाख

मध्यम खालको अढाई तलाको घरमा विद्युतीकरण प्लम्बिङको काम सकाउन करीव ७ लाख रुपैयाँ खर्च लाग्ने न्यौपाने बताउँछन् । यो खर्चमा लेवर कस्ट पनि जोडिएको छ । 

यदि तपाईंले महंगो मूल्यका लाइट र पाइपहरु प्रयोग गर्नुभयो भने खर्च पनि बढी आउँछ । बजारमा सस्ता महंगा दुबै लाईट तथा पाइपहरु पाइन्छन् । 

रङरोगन : २ लाख ५० हजार

अढाई तलाको घरमा रंगरोगन गर्नका लागि २ लाख ५० हजार रुपैयाँजति खर्च लाग्छ । 

स्टिल रेलिङ : २ लाख 

घरको भर्‍याङदेखि बार्दलीसम्म रेलिङ राख्नुपर्ने हुन्छ । अढाई तलाको घरमा भ¥याङ, ब्रान्डमा स्टिलको रेलिङ राख्दा २ लाख रुपैयाँ खर्च हुने न्यौपाने बताउँछन् । 

टायल/मार्बल : ३ लाख

घरको भर्‍याङ, भान्छादेखि गल्लीमा टायल र मार्बल प्रयोग हुन्छ । अढाई तलाको घरमा टायल, मार्बल र ग्रेनाइट राख्न ३ लाख रुपैयाँ खर्च हुन्छ । यदि तपाईंले उच्चगुणस्तरको मार्बल, टायल र ग्रेनाइट राख्न चाहेमा यो भन्दा बढी खर्च हुन सक्छ । 

मोडुलर किचन : १ लाख ५० हजार

पछिल्लो समय मोडुलर किचन बढी चलनमा आएको छ । भान्छामा मार्बल, टायल र ग्रेनाइट प्रयोग हुन्छ । यसको मूल्य माथी नै जोडिन आइसकेको छ । तपाईंले आधुनिक मोडुलर भान्छा तयार गर्दा एक लाख ५० हजार रुपैयाँ खर्च लाग्छ । भान्छामा जति बढी फर्निसिङ गर्न खोज्यो त्यति नै बढी खर्च निस्कने हो ।

ठेकेदारको ज्याला : १२ लाख

घर बनाउन निर्माण सामाग्री किनेर मात्र हुँदैन । राम्रो कन्स्ट्रक्सन कम्पनीलाई निर्माणको जिम्मा लगाउनु पर्छ । अढाई तलाको घर बनाउन ठेकेदार कम्पनीले १२ लाख रुपैयाँ ज्याला लिने न्यौपाने बताउँछन् । 

यसरी चितवनमा एउटा मध्यम खालको अढाई तलाको घर निर्माणका लागि ६५ लाख रुपैयाँ खर्च लाग्ने न्यौपानेको अनुभव छ ।