भोली सुरु हुँदैछ काठमाडौंमा दीगो शहरी विकाससम्बन्धी अन्तर्राष्ट्रिय सम्मेलन

काठमाडौं । १९ माघ अर्थात् भोलीदखि काठमडौंमा दीगो शहरी विकासम्बन्धी अन्तर्राष्ट्रिय सम्मेलन सुरु हुने भएको छ । स्थानीय योजना निर्माण मञ्‍चको पाँचौ अन्तर्राष्ट्रिय सम्मेलन पहिलो पटक नेपालमा आयोजना हुन लागेको हो । 

दुई दिनसम्म सञ्‍चालन हुने सम्मेलनमा एशिया प्रशान्त क्षेत्रका १३ देशका उच्चपदस्थ कर्मचारी र सम्बन्धित विषय विज्ञहरुको सहभागिता रहने बताइएको छ । 

‘एकीकृत र जलवायु अनुकूलन शहरी विकासका लागि स्थानीय योजना’ भन्‍ने नाराका साथ सम्मेलन आयोजना हुन लागेको शहरी विकास मन्त्रालयले जनाएको छ ।

दिगो, उत्थानशील र समावेशी समाज एवं शहरबस्ती निर्माणका लागि हातेमालो गर्ने उद्देश्यका साथ जापान सरकारले सन् २०१८ मा स्थानीय योजना निर्माण मञ्‍च गठन गरेको थियो ।

मञ्‍चमा एशिया प्रशान्त क्षेत्रका नेपाल, जापान, लाओस, भियतनाम, चीन, भारत, युगान्डा, मोजाम्बिक, भुटान, श्रीलंका, मलेसियालगायत १३ देश आबद्ध छन् । 

एक अर्काको सिकाइ तथा अनुभव आदानप्रदानका लागि सम्मेलन फलदायी हुने अपेक्षा गरिए छ ।

युएन ह्याबिट्याट एशिया प्रशान्त क्षेत्रीय कार्यालयको संयोजनमा हरेक वर्ष यससम्बन्धी बहस, छलफल, अन्तरक्रिया तथा अन्तर्राष्ट्रिय सम्मेलन हुने बताइएको छ ।

सम्मेलनको अघिल्लो दिन १८ माघ (आज) अन्तर्राष्ट्रिय प्रतिनिधिहरुले काठमाडौं उपत्यका विकास प्राधिकरणले शहरी विकासमा गरिरहेको कामबारे स्थलगत अवलोकन भ्रमण गर्ने भएका छन् ।