नगरपालिकामा बस्‍ने जनसंख्या ६६.१७ प्रतिशत

काठमाडौं । नेपालमा कुल जनसंख्याको दुई तिहाई मान्छेहरु नगरपालिकाका बासिन्दा बनेका छन् । देशैभर नगरपालिकाहरुको संख्या बढेपछि नगरपालिकामा बस्‍ने जनसंख्या पनि धेरै देखिएको हो । 

२०७८ को जनगणना अनुसार नगरपालिकाहरुमा बस्‍ने जनसंख्या ६६.१७ प्रतिशत र गाउँपालिकाहरुमा बस्‍ने जनसंख्या ३३.८३ प्रतिशत रहेको छ । 

देशमा बसोबास गर्ने कुल परिवार ६६ लाख ६६ हजार ९३७  रहेको जनगणनाले देखाएको छ । यी मध्ये व्यक्तिगत परिवार ६६ लाख ६० हजार ८४१ र संस्थागत परिवार ६ हजार ९६ रहेका छन् । 

२०६८ सालको जनगणनामा कुल परिवार संख्या ५४ लाख २७ हजार ३०२ रहेको थियो ।

प्रतिपरिवार बसोबास गर्ने सदस्य औसतमा ४.३७ जना रहेको छ । यो संख्या २०६८ सालको जनगणनामा ४.८८ जना रहेको थियो ।

परिवारको आकार रौतहटमा सबैभन्दा बढी ५.९४ र गोरखा र दोलखा जिल्लामा सबैभन्दा कम ३.४९ रहेको छ ।