महासंघ, परिसंघ र चेम्बको एउटै स्वरः घरजग्गा कर्जामा लाग्‍ने जोखिमभार घटाउ, ऋण लगानी बढाउ

काठमाडौं । निजी क्षेत्रका तीन ठूला प्रतिनिधिमूलक संस्थाहरु नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले घरजग्गा क्षेत्रमा प्रवाह हुने कर्जालाई खुकुलो बनाउन सुझाव दिएका छन् । 

आगामी वर्षका लागि मौद्रिक नीति ल्याउने गृहकार्य गरिरहेको नेपाल राष्ट्र बैंकलाई निजी क्षेत्रका प्रतिनिधिमुलक संगठनले संयुक्त सुझाव पेश गर्दै घरजग्गामा प्रवाह हुने जोखिमभार घटाउन र ऋण लगानी बढाउन आग्रह गरेका छन् । 

निजी क्षेत्रको संयुक्त सुझावमा भनिएको छ– ‘व्यापारिक प्रयोजनका सवारीसाधन, घरजग्गा र शेयर कर्जामा लाग्दै आएको जोखिम भार १५० प्रतिशतलाई पुनरावलोकन गरी १०० प्रतिशतमात्र कायम गर्नुपर्छ ।’

वैंकहरुबाट घरजग्गा कारोवारको लागि ऋण प्रवाह गर्दा काठमाडौं उपत्यकाभित्र मूल्यांकनको ३० प्रतिशत र काठमाडौं उपत्यकावाहिर ४० प्रतिशत प्रदान गर्ने व्यवस्था छ । यसलाई पनि परिमार्जन गरेर मूल्यांकनको ५० प्रतिशत ऋण प्रवाह गर्न पाउने व्यवस्था गर्न निजी क्षेत्रले सुझाव दिएको छ ।

राष्ट्र बैंकका गभर्नर महाप्रसाद अधिकारीलाई घरजग्गा कर्जाको जोखिम भार घटाएर १०० प्रतिशत कायम गर्न महासंघ अध्यक्ष चन्द्रसाद ढकालले आग्रह गरे ।

परिसंघका अध्यक्ष राजेश अग्रवालले अर्थव्यवस्थालाई मन्दिबाट बाहिर ल्याउनका लागि राष्ट्र वैंकले दोहोरो प्रकृतिको मौद्रिक नीति लिनुपर्ने सुझाव दिए । उनले भने, ‘ मुल्यबृद्धि नियन्त्रण गर्न संकुचित मौद्रिक नीति आवश्यक छ, वृद्धि तथा रोजगारी सिर्जना गर्न खुकुलो मौद्रिक नीतिको खाँचो छ ।’