बढ्दो तरलता र घट्दो ब्याजले घरजग्गामा कर्जा प्रवाह बढ्दै, जेठमा ५ अर्ब थपियो

काठमाडौं । बैंक तथा वित्तीय संस्थाहरुको घरजग्गा क्षेत्रमा कर्जा प्रवाह बढ्न थालेको छ । चालु आर्थिक वर्षको ११ महिना(साउन जेठ)सम्म घरजग्गा क्षेत्रमा २९ अर्ब ४३ करोड रुपैयाँ कर्जा प्रवाह भएको छ ।

यो कर्जा रकम वैशाखको तुलनामा पाँच अर्बले बढी हो । तर, गत वर्षको यसै अवधिको तुलनामा भने ५२ अर्बले कम हो । कर्जा प्रवाह पुरानै लयमा फर्किन भने अझै समय लाग्‍ने नेपाल राष्ट्र बैंकले सोमबार सार्वजनिक गरेको तथ्यांकले देखाउँछ ।

बैंकमा तरलता अभाव हुनुका साथै कर्जाको ब्याजदर बढेपछि कर्जा प्रवाह करिव ठप्पजस्तै भएको थियो । तर, पछिल्लो समय बढ्दो तरलता र घट्दो ब्याजदरका कारण कर्जा प्रवाह बढ्न थालेको हो ।

जेठ महिनामा पछिल्लो ११ महिनाकै सर्वाधिक धेरै ५५ हजारभन्दा बढी घरजग्गा कारोबार भएको थियो । जबकी वैशाखमा ४२ हजार हाराहारी घरजग्गा किनबेच भएका थिए ।

सरकारले पनि घरजग्गा क्षेत्रलाई खुकुलो बनाई चलायमान बनाउने नीति लिएपछि कारोबारमा चमक आउन थालेको हो ।

चालु आवको जेठ मसान्तसम्म प्रवाह भएको कुल कर्जा रकममध्ये ११ अर्ब ५९ करोड रुपैयाँ व्यक्तिगत आवासीय कर्जा रहेको छ भने १७ अर्ब ८४ लाख रुपैयाँ रियल इस्टेट कर्जा रहेको छ ।

रियल इस्टेट शिर्षकमा प्रवाह भएको कर्जा मध्ये रेसिडेन्सियल रियलस्टेट (डेढ करोडसम्मको व्यक्तिगत आवासीय कर्जा बाहेक) २ अर्ब ६९ करोड कर्जा प्रवाह भएको छ ।

यस्तै, कमर्सियल कम्पलेक्स एन्ड रेसिडेन्सियल अपार्टमेन्ट निर्माणमा ७ अर्ब २० करोड, आम्दानी सिर्जना गर्ने कमर्सियल कम्पलेक्समा २ अर्ब २४ करोड र जग्गा खरिद तथा प्लटिङ गर्न ७ अर्ब २४ करोड रुपैयाँ कर्जा प्रवाह भएको देखिन्छ ।