१० करोड लगानीमा बानेश्‍वरमा खुल्यो दीपक दीपाको सिनेमा हल

काठमाडौं । चरम आर्थिक मन्दीकै बिच चर्चित कलाकारहरुको लगानीमा नयाँ बानेश्‍वरको शंखमुल रोडमा मल्टिप्लेक्स सिनेमा हल सञ्‍चालनमा आएको छ । 

शुक्रबार बरिष्ठ कलाकार हरिवंश आचार्य र नेपाल उद्योग वाणिज्य महासंघका अध्यक्ष चन्दप्रसाद ढकालले संयुक्त रुपमा सिनेमा हल उद्घाटन गरे ।

नयाँ बानेश्वरको एनबी सेन्टरमा पाँचौं र छैटौं रहेको हलमा दीपकराज गिरी, दीपाश्री निरौला र निर्मलराज शर्माको करिव १० करोड भएको छ । हलमा रहेका दुईवटा अडिटोरियममा ३ सय ८७ जना अटाउने बताइएको छ ।

दीपक दिपाकै चर्चित सिनेमा ‘छक्का पञ्‍जा ४’ प्रर्दशन गरी हल औपचारिक रुपमा सञ्‍चालनमा ल्याइएको हो । उदघाटनका दिन आजदेखि हलमा ‘नाङ्गो गाउँ’, ‘एक भगवत र एक गीता’, ‘द नन २’ र ‘जवान’ फिल्म प्रर्दशन गरिएको छ ।

आर्थिक मन्दीकै बिच सिमयमा सिनेमा हलमा लगानी गर्ने हिम्मत गरेको भन्दै महासंघ अध्यक्ष ढकालले लगानीकर्ता कलाकारहरुलाई बधाई दिए । 

कलाकार आचार्यले आफुले गर्न नसकेको काम दीपक, दीपा र निर्मलले गरेको भन्दै खुशी व्यक्त गरे । उनले भने– ‘फिल्मबाट पैसा कमाएर हलमा लगानी गर्ने तपाईंहरु पहिलो कलाकार हो ।’