मन्दीको प्रभावः कित्ताकाट खुल्यो, तर बढेन

काठमाडौं । घरजग्गा कारोबारमा मन्दीको असर कायमै देखिएको छ । सरकारले देशैभर पुरानै अवस्थामा कित्ताकाट खुलाउँदा पनि कित्ताकाट बढ्न सकेन ।

साथै, घरजग्गा कारोबार पनि झनै घटेको भूमि व्यवस्था मन्त्रालयको तथ्यांकले देखाउँछ ।

भदौ महिनामा ३६ हजार २८० कित्ता जग्गा कित्ताकाट भई ८० हजार ३१७ पुगेको छ । यो संख्या साउनको तुलनामा सामान्य बढी भए पनि जेठ र असारको तुलनामा निकै कम हो ।

जेठमा एक लाख आठ हजार र असारमा एक लाख कित्ताकाट भएका थिए । क्रमशः कित्ताकाट बढ्दै जाने अपेक्षा विपरित साउन र भदौमा कित्ताकाट झनै घटेको देखिन्छ ।

भूउपयोग नियमाली–२०७९ लागू भएसँगै अघिल्लो असारदेखि रोकिएको कित्ताकाट गत साउनदेखि यथास्थितीमै खुलेको छ । सरकारले कित्ताकाट खुलेपछि घरजग्गा कारोबार बढ्ने र क्रमशः बजारमा पैसा आएर समग्र अर्थतन्त्र नै चलायमान बन्‍ने अपेक्षा राखेको थियो ।

तर, कित्ताकाट खुलेको पहिलो महिनाको कारोबार नै सुस्त देखिएको छ ।

कुन ठाउँमा कति कित्ताकाट ?

भदौ महिनामा सबैभन्दा धेरै कित्ताकाट झापाको भद्रपुरमा भएको छ । एक महिनामा भद्रपुर मालपोतबाट चार हजार ३१६ कित्ताकाट भएका छन् । 

सुनसरीको इनरुवामा चार हजार २३ कित्ताकाट भई दोस्रो नम्बरमा छ । यस्तै, मोरङको बेलवारीमा २६ सय ४८, धनुषामा २१ सय ७९, बाँकेमा २१ सय ६१, पर्सामा १९ सय ९९, बाराको कलैयामा १९ सय ७० कित्ताकाट भएको विभागले जनाएको छ ।

यस्तै, कैलालीको धनगढी मालपोतबाट १९ सय ६६, काभ्रेमा १९ सय ६१, सप्तरीको राजविराजमा १९ सय ३९, भक्तपुरमा १६ सय पाँच, झापाको दमकमा १५ सय ८९, ललितपुरमा १४ सय ९३, सिराहाको लहानमा १४ सय ४६, सर्लाहीको हरिवनमा १३ सय ७४ कित्ताकाट भएको देखिन्छ ।