भदौमा बढ्यो अपार्टमेन्ट किनबेच

काठमाडौं । घरजग्गा किनबेच र कित्ताकाटमा मन्दीको प्रभाव कायमै देखिए पनि भदौमा अपार्टमेन्ट किनबेच भने बढेको छ ।

भदौ महिनामा ४५ युनिट अपार्टमेन्ट किनबेच भएका छन् । यो कारोबार संख्या गत फागुनयताकै सबैभन्दा उच्च हो । फागुनमा ५१ अपार्टमेन्ट किनबेच भएको भूमि व्यवस्थापन विभागको तथ्यांक छ ।

सरकारले पुरानै अवस्थामा कित्ताकाट खुला गर्दा पनि भदौमा घरजग्गा किनबेच उल्टै घटेको छ । देशभर कित्ताकाट पनि सामान्य अंकले मात्र बढेको देखिन्छ ।

भदौमा ३५ हजार ६८६ घरजग्गा किनबेच भएका छन् भने ३६ हजार २८० कित्ता जग्गा कित्ताकाट भई ८० हजार ३१७ पुगेका छन् । भदौको घरजग्गा कारोबार ०८० सालकै सबैभन्दा कम हो ।

तर, खासै आकर्षण नदेखिने अपार्टमेन्ट किनबेचमा भने भदौमा चमक देखिएको छ । भदौमा सबैभन्दा धेरै साँखु मालपोत कार्यालयबाट २३ युनिट अपार्टमेन्ट किनबेच भएको भूमि विभागले जनाएको छ ।

यस्तै, ललितपुरको लगनखेल मालपोतबाट ११ युनिट, डिल्लीबजारबाट सात युनिट, कलंकीबाट दुई युनिट र मनमैंजु मालपोतबाट दुई युनिट अपार्टमेन्ट किनबेच भएका छन् । 

भदौ महिनामा पोखरा, पर्सा, झापा लगायतका मोफसलका सहरहरुमा एउटै अपार्टमेन्ट किनबेच भएका छैनन् । यी सहरमा पनि पछिल्लो समय अपार्टमेन्ट निर्माणको लहर आएको छ ।

पाँच महिनामा १६७ अपार्टमेन्ट किनबेच

०८० सालको पहिलो पाँच महिनामा देशभरबाट एक सय ६७ अपार्टमेन्ट किनबेच भएको तथ्यांक छ । वैशाखमा ३० अपार्टमेन्ट किनबेच भएकोमा जेठमा २९, असारमा ३३ र साउनमा ३० युनिट अपार्टमेन्ट किनबेच भएका थियो ।

०९७ सालमा असार र फागुन महिनामा सबैभन्दा धेरै अपार्टमेन्ट किनबेच भएको देखिन्छ । भूमि विभागका अनुसार असारमा ९८ युनिट र फागुनमा ५१ युनिट अपार्टमेन्ट किनबेच भएका छन् । अरु महिना ४० भन्दा कम युनिट अपार्टमेन्ट किनबेच भएका थिए । 

नेपालमा अझै पनि अपार्टमेन्ट भन्दा पनि सिंगल युनिट घरकै माग बढ्दो छ । अपार्टमेन्ट छिटपुट मात्र किनबेच हुने गरेका छन् । पछिल्लो समय नयाँ अपार्टमेन्ट निर्माण नहुँदा बिक्रीका लागि स्टक अपार्टमेन्ट समेत नभएको घरजग्गा व्यवसायीको भनाई छ ।