विनोद चौधरीले सञ्‍चालनमा ल्याए १५ अर्ब लगानीमा पाल्पा सिमेन्ट उद्योग, निर्यात पनि सुरु

काठमाडौं । पाल्पाको सोमादी सर्देवामा स्थापना गरिएको सिजी पाल्पा सिमेन्ट उद्योगले उत्पादन सुरु गरेको छ । चर्चित व्यवसायिक घराना चौधरी ग्रुपले करिव १५ अर्ब रुपैयाँ लगानी गरेर ठूलो क्षमतामा क्लिंकरसहितको सिमेन्ट उद्योग सञ्‍चालनमा ल्याएको हो ।

करिव पाँच सय रोपनी क्षेत्रफलमा फैलिएको यस उद्योगको अहिलेलाई दैनिक उत्पादन क्षमता चार हजार मेट्रिक टन रहेको बताइएको छ । यो चौधरी समूहको तेस्रो सिमेन्ट उद्योग हो । 

सिजी सिमेन्ट इन्डष्ट्रिज पाल्पा प्रालिले वार्षिक नौ लाख २४ हजार मेट्रिक टन क्लिंकर र नौ लाख ७३ हजार मेट्रिक टन सिमेन्ट उत्पादन गर्ने गरी उद्योग विभागबाट अनुमति लिएको छ । जसमा ओपीसी सिमेन्ट आठ लाख ३२ हजार मेट्रिक टन र पीपीसी सिमेन्ट एक लाख ४१ हजार मेट्रिक टन उत्पादन हुनेछ ।

कोभिड महामारी, निर्माण क्षेत्रमा छाएको मन्दीलगायत विविध कारणले ढिलो गरी सञ्‍चालनमा आएको उद्योगबाट क्लिंकर उत्पादनलाई बढी जोड दिइएको छ । यस उद्योगले नवलपरासीको दुम्किवासमा रहेको चौधरी समूहकै सिजी सिमेन्ट उद्योगलाई क्लिंकर आपूर्ति गर्नेछ । साथै, अन्य उद्योगमा पनि क्लिंकर आपूर्ति गरिने बताइएको छ ।

चौधरी ग्रुपले नयाँ उद्योग सञ्चालनमा ल्याएसँगै सिमेन्ट निर्यातको समेत थालनी गरेको छ । यही २१ भदौदेखि सिजीले सिमावर्ती भारतीय बजारमा सिमेन्ट निर्यात सुरु गरेको हो ।

सिमेन्ट निर्यातका लागि सिजीले भारतीय चर्चित व्यवसायिक घराना अदानी ग्रुपसँग रणनीतिक साझेदारी गरेको छ । सिजीले आफ्नै मौलिक ब्रान्डमा नभएर अदानी ग्रुपले उत्पादन गर्ने ब्रान्डमा सिमेन्ट निर्यात सुरु गरेको बताइएको छ ।

अब सिजीसँगै सिमेन्ट निर्यात गर्ने उद्योग चार पुगेका छन् । २४ असारमा पहिलो पटक आरएमसी ग्रुपले तानसेन ब्रान्डको सिमेन्ट निर्यात सुरु गरेको थियो । त्यसपछि अर्घाखाँची र बालाजी सिमेन्ट उद्योगले पनि सिमेन्ट तथा क्लिंकर निर्यात सुरु गरिसकेका छन् ।

गत आर्थिक वर्षभरीमा करिव ७८ करोड रुपैयाँ बराबरको सिमेन्ट तथा क्लिंकर निर्यात भएकोमा चालु आवको साउनमा मात्रै निर्यात साढे २३ करोड पुगेको छ । ठूला घरानाहरु थपिएसँगै यस वर्ष सिमेन्ट तथा क्लिंकर निर्यात करिव ५÷६ अर्ब पुग्‍ने अनुमान छ ।

एक दशकअघि नवलपरासीको दुम्किवासमा उद्योग खोलेर चौधरी ग्रुप पहिलो पटक सिमेन्ट उत्पादनमा प्रवेश गरेको थियो । सुरुमा दैनिक १२ सय मेट्रिक टनको ग्रान्डिङ युनिट राखिएको सो उद्योगको उत्पादन क्षमता बढाएर अहिले दैनिक तीन हजार मेट्रिक टन पुर्याइएको छ ।

चौधरी समूहले दाङमा रहेको सम्राट सिमेन्ट उद्योग पनि खरिद गरिसकेको छ । सम्राट सिमेन्ट उद्योगको ३० प्रतिशत शेयर खरिद गर्न करिव तीन अर्ब लगानी गरेको बताइएको छ । यो पश्‍चिम नेपालकै ठूलोमध्येको उद्योग हो ।

तीनवटा उद्योगमा चौधरी समूहले २० अर्बभन्दा बढी लगानी गरिसकेको छ ।