उपत्यकामा २३% ले घट्यो घरजग्गा कारोबार, पाँच महिनामा २० हजार लिखत पारित

काठमाडौं । वर्ष ०८० को पहिलो पाँच महिनामा काठमाडौं उपत्यकाभित्र घरजग्गा किनबेच २३ प्रतिशतले घटेको छ । वैशाखदेखि भदौसम्म उपत्यकामा रहेका तीन जिल्लामा २० हजार ५०६ घरजग्गाको लिखत पारित भएको छ ।

गत वर्षको सोही अवधि (वैशाख–भदौ)मा २६ हजार ६८४ घरजग्गाको लिखत पारित भएको थियो । भूउपयोग नियमावली २०७९ जारी भएर कित्ताकाटमा कडाई हुनुका साथै तरलता अभाव, चर्को ब्याजदर र महंगीको प्रभाव घरजग्गा किनबेचमा गहिरो परेको देखिन्छ ।

काठमाडौं उपत्यकाका तीन जिल्ला ललितपुर, भक्तपुर र काठमाडौंमा नौवटा मालपोत कार्यालय छन् । ललितपुरमा दुई, काठमाडौंमा ६ र भक्तपुरमा एउटा मालपोत कार्यालय छन् । उपत्यकामा सबैभन्दा धेरै घरजग्गाको लिखत पारित हुने मालपोत कार्यालयमा लगनखेल, भक्तपुर र कलंकी अग्रणी रहेका छन् ।

यस्तो छ उपत्यकामा घरजग्गाको लिखत पारित

कुनै समय सबैभन्दा धेरै संख्यामा घरजग्गा किनबेच गराउने उपत्यकाका मालपोत कार्यालयलाई अहिले उपत्यका बाहिरका मालपोतले पछाडि पारिसकेका छन् । 

अहिले धेरै घरजग्गा किनबेच गराउनेमा झापा, मोरङ, सुनसरी, धनुषा, बाँके र कैलालीका मालपोत अग्रस्थानमा रहेको भूमि व्यवस्थापन तथा अभिलेख विभागको तथ्यांकले देखाउँछ ।

उपत्यका नौ वटा मालपोत कार्यालयबाट वैशाखमा तीन हजार ६८३, जेठमा चार हजार ७३५, असारमा पाँच हजार ३०, साउनमा तीन हजार ४१२ र भदौमा तीन हजार ६४६ घरजग्गाको लिखत पारित भएको छ । 

वैशाखदेखि भदौसम्म पाँच महिनामा लगनखेल मालपोतबाट चार हजार ७५३, गोटिखेलबाट १०३, भक्तपुरबाट चार हजार ८७०, डिल्ली बजारबाट एक हजार ३९, चावाहिलबाट दुई हजार १२५, कलंकीबाट तीन हजार २९१, साँखुबाट दुई हजार २५७, मनमैंजुबाट एक हजार ३१० र टोखा मालपोतबाट ७५८ घरजग्गाको लिखत पारित भएको छ ।