दुई महिनामा भित्रियो २८ अर्बको फलाम तथा स्टिल

काठमाडौं । चालु आर्थिक वर्षको पहिलो दुई महिनामा फलाम तथा स्टिल र तिनबाट बनेको सामाग्रीको आयात करिव ३३ प्रतिशतले घटेको छ । निर्माण क्षेत्रमा छाएको मन्दीले निर्माणजन्य सामाग्री उत्पादन गर्ने फलाम तथा स्टिलको आयात घटेको हो ।

चालु आर्थिक वर्षको साउन र भदौमा २७ अर्ब ७३ करोड रुपैयाँ बराबरको फलाम तथा स्टिल र त्यसबाट बनेका तयारी सामान आयात भएको भन्सार विभागले जनाएको छ । गत आवको सोही अवधिमा ४१ अर्ब २५ करोड मूल्यको यस्ता सामाग्री आयात भएका थिए ।

साउन र भदौमा नेपालबाट दुई अर्बको ७६ करोड रुपैयाँ बराबरको यस्ता सामाग्री निर्यात भएको छ । गत वर्षको सोही अवधिमा सवा दुई अर्ब रुपैयाँको निर्यात भएको थियो ।

भन्सार विभागका अनुसार,चालु आर्थिक वर्षको साउन र भदौमा २४ अर्ब ४९ करोड रुपैयाँको फलाम तथा स्टिल आयात गरिएको छ । यस्तै, तीन अर्ब २३ करोड रुपैयाँभन्दा बढीको फलाम तथा स्टिलबाट बनेका सामाग्रीहरु आयात गरिएका छन् ।

सोही अवधिमा नेपालबाट दुई अर्ब ६२ करोडको फलाम तथा स्टिल निर्यात भएको छ । १४ करोड रुपैयाँ बराबरको फलाम तथा स्टिलबाट बनेका सामाग्रीहरु निर्यात भएको देखिन्छ ।

दुई महिनामा फलाम तथा स्टिलजन्य सामाग्रीको व्यापारमा नेपाललाई २४ अर्ब ९६ करोड रुपैयाँ व्यापार घाटा भएको छ । यो व्यापारबाट सरकारले चार अर्ब ९० करोड रुपैयाँ राजश्व संकलन गर्न सकेको छ ।

गच आर्थिक वर्षभरीमा एक खर्ब ६७ अर्ब रुपैयाँ मूल्य बराबरको फलाम तथा स्टिल र तीनका सामाग्री आयात भएको थियो । नेपालबाट १० अर्ब ८२ करोड रुपैयाँको मात्रै यस्ता सामाग्रीहरु निर्यात भएको भन्सार विभागले जनाएको छ । 

यस्तै, अघिल्लो आर्थिक वर्ष ०७८÷७९ मा एक खर्ब ८५ अर्बको फलाम तथा स्टिल र तिनबाट बनेका सामाग्री आयात गरिँदा तीन अर्ब ८७ करोडको मात्रै निर्यात भएको देखिन्छ ।