असोजमा फेरी घट्यो अपार्टमेन्ट खरिद बिक्री

काठमाडौं । असोजमा अपार्टमेन्ट किनबेच फेरी घटेको छ । एक महिनामा ३८ युनिट अपार्टमेन्ट मात्रै किनबेच भएको भूमि व्यवस्थपन विभागले जनाएको छ । 

भदौमा ४५ युनिट अपार्टमेन्ट किनबेच भएका थिए, जुन गत फागुनयताकै सबैभन्दा उच्च थियो । फागुनमा ५१ युनिट अपार्टमेन्ट किनबेच भएका थिए । 

भदौदेखि अपार्टमेन्ट किनबेचले लय समाउने अपेक्षा विपरित असोजमा उल्टै घटेको छ । हाइराइज अपार्टमेन्ट खरिद गर्ने ग्राहकहरु हुँदा हुँदै पनि बिक्री गर्ने युनिटक कम हुँदा समग्र कारोबार कम देखिएको रियल इस्टेट डेभलपर्स बताउँछन् ।

सकिए नयाँ युनिट 

भूकम्पपछि नयाँ अपार्टमेन्ट निर्माण सम्पन्‍न नभएकोले अहिले पुरानै युनिट किनबेच भइरहेको अवस्था छ । पुराना अपार्टमेन्टकाे स्टक पनि करिव सकिएकाे व्यवसायीकाे भनाइ छ ।

असोजमा देशभर घरजग्गा किनबेचदेखि राजश्‍व असुली बढ्दा पनि अपार्टमेन्ट किनबेच ओरालो लागेको देखिन्छ । असोजमा ३९ हजारभन्दा बढी घरजग्गाको लिखत पारित भएको भूमि विभागको तथ्यांक छ ।

असोजमा सबैभन्दा धेरै अपार्टमेन्ट किनबेच कलंकी मालपोत कार्यालयबाट भएको देखिन्छ । कंलकी मालपोतबाट एक महिनामा २१ युनिट अपार्टमेन्ट किनबेच भएका छन् । यस्तै, ललितपुरको लगनखेल मालपोत कार्यालयबाट १० युनिट अपार्टमेन्ट किनबेच हुँदा डिल्ली बजारबाट पाँच चावहिल मालपोतबाट दुइ युनिट अपार्टमेन्ट किनबेच भएका छन् ।

६ महिनामा २०५ युनिट किनबेच

वर्ष ०८० को वैशाखदेखि असोजसम्म ६ महिनामा २०५ युनिट अपार्टमेन्ट किनबेच भएका छन् । भूमि विभागका अनुसार वैशाखमा ३० युनिट, जेठमा २९ युनिट, असारमा ३३ युनिट, साउनमा ३० युनिट र भदौमा ४५ युनिट अपार्टमेन्ट किनबेच भएका थिए ।