नक्सालमा खुल्यो ‘होलिडे इन एक्सप्रेस’, दुई अर्ब लगानी

काठमाडौं । कर्पोरेट हबको परिचय बनाइरहेको नक्सालमा चर्चित अन्तर्राष्ट्रिय चेन होटल ‘होलिडे इन एक्सप्रेस काठमाडौं’ सञ्‍चालनमा आएको छ । करिव दुई अर्ब रुपैयाँ लगानी भएको होटेल पर्यटनमन्त्री सुदन किराँतीले उद्घाटन गरे ।

हस्तकला निकासीकर्ता (व्यवसायी) नरेशलाल श्रेष्ठको अगुवाईमा सञ्‍चालनमा आएको होटेलमा महेश्‍वर श्रेष्ठ र सुजित श्रेष्ठको पनि लगानी रहेको छ । नरेशलाल नेपाल उद्योग वाणिज्य महासंघका कार्यकारिणी सदस्य हुन्, जो महासंघकै निर्यात समितिका सभापति पनि छन् ।

इन्टरकन्टिनेन्टल होटेल ग्रुप (आइजिएच)को चेन ब्रान्ड ‘होलिडे इन एक्सप्रेस’ पहिलो पटक नेपालमा भित्रिएको हो । दुई रोपनी क्षेत्रफलमा निर्माण भएको होटेलमा एक सयवटा कोठा रहेका छन् । होटेलमा डेढ सय जना अटाउने दुईवटा बैंक्वेट हल र दुईवटा रेष्टुरेन्ट रहेका छन् ।

यो होटेल डिसेम्बरदेखि पूर्ण क्षमतामा सञ्‍चालनमा आउने सञ्‍चालक श्रेष्ठले बताए । होटेल छेवैको दुई रोपनी क्षेत्रफलमा सपिङ मल, विशाल बैंक्वेट हलसहित स्वीमिङ पुल निर्माण गर्ने तयारी भइरहेको उनको भनाई छ ।

होटेलको छतबाट काठमाडौं भ्याली, वरिपरिका हरियाली पहाड र उत्तरतर्फ हिमाली दृश्यावलोकन गर्न सकिन्छ । 

होलिडे इन एक्सप्रेस विश्वका ११० देशमा ६ हजारभन्दा बढी होटेल तथा रिसोर्ट सञ्‍चालनमा रहेको बताइएको छ ।