काठमाडौं महानगरमा १५% बढ्यो घरबहाल कर, नौ महिनामा उठ्यो दुई अर्ब नौ करोड

काठमाडौं । काठमाडौं महानगरपालिकाभित्र पछिल्लो नौ महिनामा घरबहाल कर करिव १५ प्रतिशतले बढेको छ ।

चालु आर्थिक वर्षको साउनदेखि चैतसम्म नौ महिनामा घरबहाल कर दुई अर्ब नौ करोड ३३ लाख रुपैयाँ उठेको छ । यो रकम गत वर्षको सोही अवधिको तुलनामा २६ करोड ७० लाख रुपैयाँले बढी हो ।

गत आवको नौ महिनामा काठमाडौं महानगरमा एक अर्ब ८२ कारेड ६३ लाख रुपैयाँ घरबहाल कर उठेको थियो ।

समग्र आम्दानीमा ९ प्रतिशतको बढोत्तरी 

यस वर्ष काठमाडौं महानगरको आन्तरिक राजश्व, फाँडफाँटबाट प्राप्त राजश्व र आन्तरिक अनुदान गरी समग्र आम्दानी ९.२० प्रतिशतले बढेको छ । 

चालु आवको नौ महिनामा महानगरले कुल सात अर्ब १७ करोड रुपैयाँ आम्दानी गर्न सफल भएको छ । जसमा आन्तरिक राजश्व चार अर्ब २६ करोड, बाँडफाँटबाट प्राप्त राजश्व एक अर्ब ५४ करोड र आन्तरिक अनुदान एक अर्ब ३८ करोड रुपैयाँ रहेको छ ।

गत वर्षको सोही अवधिमा महानगरको कुल अम्दानी ६ अर्ब ५७ करोड रुपैयाँ रहेको थियो । यो वर्ष आम्दानी ९.२० प्रतिशत अर्थात् ६० करोड ३९ लाख रुपैयाँ बढी प्राप्त भएको देखिन्छ । 

यस वर्ष महानगरको आन्तरिक राजश्व संकलन ४ प्रतिशत, बाँडफाँटबाट प्राप्त राजश्व ५७ प्रतिशतले बढ्दा आन्तरि अनुदान ७.७८ प्रतिशतले घटेको छ ।

कुन शिर्षकमा कति राजश्व संकलन ?

महानगरको सबैभन्दा ठूलो आम्दानी घरबहाल कर रहेको छ, जुन नौ महिनामा दुई अर्ब नौ करोड रुपैयाँ उठेको छ ।

यस्तै, नौ महिनाको अवधिमा सम्पत्ति कर १९.७६ प्रतिशतले बढेर ९४ करोड ४६ लाख रुपैयाँ संकलन भएको छ । भुमि तथा मालपोत कर ९६ लाख ७२ हजार, पर्यटन शुल्क १५ करोड १३ लाख रुपैयाँ उठेको छ ।

अन्य सेवा शुल्क १६ करोड ३२ लाख, शिक्षा क्षेत्रको आम्दानी ५५ लाख, अन्य प्रशासनिक सेवा शुल्क ४१ लाख, नक्सापास दस्तुर २९ करोड १२ लाख रुपैयाँ उठेको महानगरले जनाएको छ ।

सिफारिस दस्तुर ६ करोड ८९ लाख, नाता प्रमाणित दस्तुर ३६ लाख ६६ हजार, व्यवसाय रजिष्ट्रेसन दस्तुर ४६ कारेड ३४ लाख रुपैयाँ उठेको छ ।

यस्तो छ विस्तृत विवरण