घरजग्गा मेलामा अफरै अफर

काठमाडौं । भृकुटीमण्डको प्रर्दशनी हलमा आयोजित आठौं रियल इस्टेट एक्स्पोमा घरजग्गा व्यवसायीहरुले ग्राहक लोभ्याउन आकर्षक अफर पस्किएका छन् । 

मेलामा व्यवसायीले घरजग्गा खरिदमा किस्ताबन्दी सुविधा, देशको जुनसुकै ठाउँमा रहेको घरजग्गासँग राजधानीमा घर साट्न पाइनेदेखि ४० प्रतिशत नगद छुटसम्मका अफर ल्याएका छन् ।

१२ पुसदेखि सञ्‍चालन भएको मेला आज सकिँदै छ । मेलामा रियल इस्टेट, बैंक, सोलार प्यानल, फर्निचर लगायतका ६० वटा स्टल रहेका छन् । घरजग्गा खरिद गर्ने सोँचमा रहेका उपभोक्ताले मेलामा बुकिङ गरी यस्तो सुविधा लिन सक्नेछन् । 

डाउनटाउनको किस्ताबन्दी सुविधा

डाउनटाउन हाउजिङले मेलामा किस्ताबन्दीमा घरजग्गा खरिद गर्न सकिने सुविधा ल्याएको छ । कम्पनीले ललितपुरको धापाखेलमा १०२ रोपनी क्षेत्रफलमा निर्माण गरिरहेको हाउजिङ परियोजनाका लागि किस्ताबन्दी योजना ल्याएको हो ।

परियोजनामा घडेरीमात्र खरिद गरेर राख्‍न पनि पाइने डाउनटाउन हाउजिङका अध्यक्ष मिनमान श्रेष्ठले बताए । परियोजनामा ४० प्रतिशत रकम डाउनपेमेन्ट गरेपछि बाँकी किस्ता ३६ देखि ७२ महिनासम्म तिर्न सकिने व्यवस्था गरिएको छ । त्यो पनि शून्य प्रतिशत ब्याजदरको सुविधामा ।

ग्राहकले ४० प्रतिशत रकम डाउनपेमेन्ट गरेपछि कम्पनीले घरजग्गा पास गरेर हस्तान्तरण गर्नेछ । ‘बाँकी ६० प्रतिशत रकम किस्ताबन्दमिा तिर्न सकिनेछ’ श्रेष्ठले भने, ‘रियल इस्टेट क्षेत्रमा यस्तो सुविधा पहिलो पटक ल्याइएको हो ।’

किस्ताबन्दी सुविधामा ब्याजदर र बैंकिङ ह्यासल नहुने बताइएको छ । बैंकमा ब्याजदर थपघट भयो भनेर पनि चिन्ता लिनु पर्दैन । यो सुविधा मेलामा घरजग्गा बुकिङ गर्नेले मात्र प्राप्त गर्नेछन् । 

जग्गासँग घर साटफेर गर्न पाइने

व्यवसायी दीपक मलहोत्रा नेतृत्वको नेपाल रियल इस्टेट म्यानेजमेन्ट कम्पनीले देशभरका जुनसुकै ठाउँमा रहेका घरजग्गासँग ललितपुर र भक्तपुरको हाउजिङमा घर वा जग्गा साटफेर गर्न पाउने सुविधा दिएको छ । कम्पनीले मेलामा पोपर्टी एक्सचेञ्‍ज अफर ल्याएको हो ।

कम्पनीले घर वा जग्गा खरिदमा १५ प्रतिशतसम्म छुट पनि दिएको छ । चाँगुनारायण र भैंसेपाटीमा बनिरहेको हाउजिङमा यस्तो सुविधा प्राप्त गर्न सकिने छ ।

चाँगुनारायको हाउजिङमा १४२ युनिट र भैंसेपाटीमा ५५ युनिट रहेका छन् । कम्पनीले भैंसेपाटीमा प्रतिआना ४२ लाखदेखि ५० लाखसम्म र चाँगुनारायणको जग्गाको मूल्य प्रतिआन साढे २९ लाख रुपैयाँ तोकेको छ ।

मेलामा ९९ हजार रुपैयाँ बुझाएर घर तथा जग्गा बुकिङ गर्न सकिने र पछि साइट भिजिट गर्दा चित्त नबुझे पैसा फिर्ता हुने कम्पनीले जनाएको छ ।

पद्मको ७ प्रतिशत छुट अफर

पद्म रेसिडेन्सीले रामकोट र ठूलो भर्याङमा निर्माण गरिरहेको हाउजिङ र अपार्टमेन्ट परियोजनामा ७ प्रतिशतसम्म छुट योजना ल्याएको छ । 

ठूलो भर्याङमा निर्माण भइरहेको १० तले अपार्टमेन्टमा १३४ युनिट तयार हुँदैछन् । अपार्टमेन्टमा ५९१ देखि १२२२ स्कायरफिटसम्मका अपार्टमेन्ट छन्, जहाँ बस्नका लागि प्रतिस्क्वायरफिट साढे २१ हजार रुपैयाँ तिर्नुपर्ने हुन्छ ।

कम्पनीले रामकोटमा पनि ४९ रोपनीमा हाउजिङ र अपार्टमेन्ट निर्माण गर्दैछ ।

भूमि डेभलपर्सको ५० लाख छुट योजना

भूमि डेभपर्सले गोदावरीमा ४० रोपनी क्षेत्रफलमा निर्माण गरिरहेको हाउजिङ परियोजनामा घर खरिद गर्नेलाई ५० लाख रुपैयाँ छुट योजना ल्याएको छ । त्यहाँ साढे दुई तलाका ७२ घर निर्माण हुनेछन् ।

पाँचदेखि ११ आनासम्म बनेका घरको मूल्य चार करोडदेखि ६ करोड रुपैयाँसम्म रहेको बताइएको छ ।

उल्लेखित कम्पनीहरुले मेलामा घरजग्गा बुकिङ गर्नेका लागि यस्तो सुविधा ल्याएका हुन् । मेलापछि यस्तो सुविधा उपलब्ध नहुन पनि सक्ने देखिन्छ ।

अन्य कम्पनीका अफर

यस्तै, मनमैजु रेसिडेन्सीले हाउजिङका घर खरिदमा ३० देखि ४० प्रतिशतसम्म छुट सुविधा ल्याएको छ । सिद्धार्थ हाउजिङले चोभारमा निर्माण गरिरहेको जलविनायक कोलोनीमा घर खरिदमा १५ प्रतिशत र जग्गा खरिदमा १२ लाख रुपैयाँ छुट दिने बताइएको छ । कम्पनीले चोभारमा ४७ रोपनीमा कोलोनी बनाउँदै छ, जहाँ घर र जग्गा खरिद गर्न पाउने सुविधा छ । 

हेटौंडामा चारवटा डेभलपर्स कम्पनीले ७० विगाहा क्षेत्रफलमा गरिरहेको प्लटिङमा जग्गा खरिद गर्दा १५ प्रतिशत छुटको व्यवस्था गरेको छ । त्यहाँ २५ सयवटा घडेरी विकास भइरहेको कम्पनीले जनाएको छ ।