१० करोड लगानीमा 'त्रिशुली भिल्ला' सञ्चालन

काठमाडौं । पृथ्वी राजमार्गको मलेखु नजिक बेनिघाटमा त्रिशुली रिभरसाइड रिसोर्ट सञ्चालन गरिरहेका उद्दव कँडेलले त्रिशुली नदीको पारीपट्टी ’त्रिशुली भिल्ला’ सञ्चालनमा ल्याएका छन् ।   

१५ रोपनी क्षेत्रफलमा फैलिएको भिल्लामा करिव १० करोड रुपैयाँ लगानी भएको कँडेलले बताए । लक्जरी सुविधाहरु भएको १२ वटा आकर्षक भिल्लामा ३७ कोठा बनाइएको छ । 

अहिले २२ कोठा सञ्चालनमा आएको र केही महिनामै बाँकी १५ कोठा पनि सञ्चालनमा ल्याउने उनले बताए । भिल्लामा तीनसय जना क्षमताको कन्फ्रेन्स हल समेत निर्माण गरिएको छ । 

‘वेलनेस’ प्रेमी पाहुनालाई ध्यानमा राख्दै भिल्लामा साउना र स्टिमको समेत व्यवस्था गरिएको छ । भिल्लामा पाहुनाहरुले प्राइभेट पार्टी, क्याम्प फायर, बार्बिक्यु लगायतको मज्जा लिन सक्नेछन् । 

भिल्लामा न्युनतम चार हजार रुपैयाँदेखि प्याकेज बुक गर्न सकिन्छ । भिल्लामा बुकिङ गर्ने ग्राहकले डिनर, रुम र ब्रेकफास्टसँगै वेलनेस प्याकेजअन्तर्गत स्विमिङ पुल, साउना, स्टिम र हाइकिङ समेत गर्न पाउने बताइएको छ । 

भिल्लामा रेस्टुरेन्ट तथा बारको समेत व्यवस्था गरिएको छ । रुमको बालकोनीबाट त्रिशुली नदीको सुन्दर दृश्यावलोकन गर्न पाउनु भिल्लाको अर्को आकर्षण हो । 
कर्पोरेट ग्राहकमात्र नभएर कुनै विशेष पार्टीको मज्जा लिन तथा विवाह गर्न समेत भिल्ला उत्तम गन्तव्य बन्ने सञ्चालक कँडेलले बताए ।

अविरल बग्ने त्रिशुली नदी र आसपासमा भएका वनजंगल लगायतको दृश्यावलोकन गर्दै भिल्लामा रमाउँदाको आनन्द शब्दमा वर्णन नै गर्न सकिँदैन् ।

रिभरसाइड रिसोर्ट साहसिक पर्यटनको हबको रुपमा विकास हुँदै गएको छ । त्रिशुली नदीमाथि स्काइ साइक्लिङ, जिपलाइन, त्रिशुली नदीमा साहसिक र्‍याफ्टिङजस्ता साहसिक पर्यटनको मज्जा समेत रिसोर्टका पाहुनाले लिन सक्नेछन् । 

भिल्ला पुग्न पृथ्वी राजमार्गको मालिंगा झरेपछि त्रिशुली रिभरसाइड रिसोर्टबाट जिपलाइन वा स्काई साइक्लिङमार्फत जान सकिन्छ । 

एडभेञ्चर नरोज्ने पाहुनाहरू झोलुङ्गे पुल तरेर भिल्ला पुग्न सक्छन् । सवारी साधन लिएर जानेका लागि नदी वारी नै पार्किङको सुविधा छ । बाइक भने झलुङ्गे पुल हुँदै भिल्लासम्मै लैजान सकिन्छ ।