जनता आवास कार्यक्रमः ४१ हजार आवास निर्माण सम्पन्न, १९ हजार अझै बाँकी

काठमाडौं । जनता आवास कार्यक्रम अन्तर्गत ०८० फागुनसम्म ४१ ह्जार १५७ आवास निर्माण सम्पन्न भएका छन् । सरकारले यस कार्यक्रमबाट ६० हजार २७४ आवास निर्माण गर्ने लक्ष्य राखेको छ ।

यस कार्यक्रम अन्तर्गत आर्थिक वर्ष ०७४/७५ सम्म संघीय सरकारबाट १७ हजार ३९ आवास निर्माण सम्पन्न भएका थिए । आव ०७५/७६ देखि प्रदेशबाट कार्यान्वयन हुने गरी हस्तान्तरण गरिएको यस कार्यक्रमअन्तर्गत हालसम्म २४ हजार १४८ आवास निर्माण सम्पन्‍न भएको आर्थिक सर्वेक्षण ०८०/८१ मा उल्लेख छ ।

एकीकृत आधुनिक सुरक्षित बस्ती विकास कार्यक्रम अन्तर्गत विपदको समयमा विस्थापितलाई तत्काल स्थायी रुपमा आवास उपलब्ध गराउन देशका विभिन्‍न स्थानमा ७ इमर्जेन्सी सेल्टर निर्माण सम्पन्न भएका छन् ।

यस्तै, सुरक्षित आवास कार्यक्रम अन्तर्गत ०८० असारसम्म ५२ हजार ९३८ आवासमा फुसको छानालाई जस्तापाताले विस्थापन गरिएको छ । चालु आवको फागुनसम्म थप २७ हजार ९९१ आवासमा फुसको छानालाई जस्तापाताले विस्थापन गरिएकोमा ०८० फागुनसम्म यस्तो संख्या ८० हजार ९२९ पुगेको बताइएको छ ।

०८० फागुनसम्म प्रदेश प्रमुख, मुख्यमन्त्री र विशेष सरकारी वकिल कार्यालयको आवास निर्माण कार्य सम्पन्‍न भएका छन् । संघीय संसद भवनको ७९ प्रतिशत र मन्त्री आवासको ९९ प्रतिशत काम भएको छ । यस्तै, विभिन्न शहरमा ९ सभाहल निर्माण गर्ने लक्ष्य रहेकोमा हालसम्म ३ सभाहल निर्माण कार्य सम्पन्‍न भएका छन् ।