कमर्सियल कम्लेक्स र आवासीय अपार्टमेन्ट निर्माणमा सवा ३३ अर्ब कर्जा प्रवाह

काठमाडौं । कमर्सियल कम्पलेक्स तथा आवासीय अपार्ट निर्माणमा प्रवाह हुने कर्जाको वृद्धिदर घटेको छ । आर्थिक वर्ष ०७९÷८० मा २२.८ प्रतिशतले बढेको यस्तो कर्जा गत आर्थिक वर्षमा ७.२ प्रतिशतले मात्रै बढेको देखिन्छ ।

बैंक तथा वित्तीय संस्थाहरुबाट हालसम्म कमर्सियल कम्पलेक्स र रेसिडेन्सियल अपार्टमेन्ट निर्माणका लागि भनेर ३३ अर्ब २७ करोड रुपैयाँ कर्जा प्रवाह भएको नेपाल राष्ट्र बैंकको तथ्यांकले देखाउँछ । 

गत आवमा दुई अर्ब २४ करोड रुपैयाँले थपिएको हो । अघिल्लो आव ०७९/८० मा कम्पलेक्स र अपार्टमेन्ट निर्माण शिर्षकको कर्जा पाँच अर्ब ७६ करोड ६५ लाख रुपैयाँले वृद्धि भएको थियो ।

रियल इस्टेटमा आएको शिथिलताका कारण बैंकको कर्जा प्रवाह पनि घटेको तथ्यांकले देखाउँछ । पछिल्लो समय निर्माणको चरणमा रहेका कमर्सियल कम्पलेक्स र अपार्टमेन्टहरु पनि रोकिएका छन् । एकातिर व्यापार व्यवसायमा शिथिलता छाएको र अर्कोतर्फ आवास (अपार्टमेन्ट) खरिद गर्ने ग्राहक नहुँदा कम्पलेक्स र अपार्टमेन्ट निर्माण सुस्ताएको हो ।